काठमाडौं । संघीय संसद सचिवालयको महासचिव पदमा पदमप्रसाद पाण्डेय सिफारिस भएका छन् ।

एमाले समर्थक पाण्डेय प्रतिनिधिसभाका सचिव पनि हुन् । संविधानको धारा १०६ बमोजिम प्रतिनिधिसभाका सभामुख र राष्ट्रियसभाका अध्यक्षको संयुक्त सिफारिसमा पाण्डेयको नाम महासचिवका लागि राष्ट्रपति रामचन्द्र पौडेलसमक्ष सिफारिस भएको छ ।

महासचिवमा पाण्डेयको नाम सिफारिस भएको संसद सचिवालयले जनाएको छ । पाल्पा जिल्ला निवासी पाण्डेयलाई महासचिव बनाउन एमालेका उपाध्यक्ष विष्णु पौडेलको ठूलो योगदान छ । पौडेल कृषि मन्त्री रहेका बेला पाण्डेय मन्त्रालयमा निजामती कर्मचारीको तर्फबाट निजी सचिव रहेका थिए ।

संघीय संसद सचिवालयका महासचिव भरतराज गौतमले घरासयी कारण देखाउँदै मंसिर २४ गते पदबाट राजीनामा दिएका छन् ।

राष्ट्रिय सभा अध्यक्षको कार्यकाल सकिएपछि नेकपा (माओवादी केन्द्र) वा नेपाली कांग्रेसको भागमा अध्यक्ष आउने निश्चित जस्तै छ ।

त्यस अबधिमा महासचिव गौतमको कार्यकाल सकिँदा, महासचिवमा एमालेको सिफारिस नचल्ने देखिएपछि, पूर्व तयारी अनुसार महासचिव फेरिएको छ ।