काठमाडौं । विश्व बौद्ध शिखर सम्मेलनको तेस्रो महाधिवेशनबाट संविधानसभा सदस्य तथा लुम्बिनी विकास कोषका उपाध्यक्ष प्रथम योल्मो खेन्पो (छिमे छिरिङ) डा.ल्हारक्याल लामा अन्तर्राष्ट्रिय बौद्ध महासंघ (आईबीसी)को अध्यक्ष पदमा चयन भएका छन् ।

विश्वभरका बुद्धमार्गी तथा सरकारहरू संलग्न रहेको सर्वोच्च संस्था आईबीसीको शक्तिशाली अधिकार प्राप्त कार्यकारी स्थायी समितिमा निर्वाचित गर्दै अध्यक्ष पदमा निर्वाचित गरिएको छ । सम्मेलन भारतको नयाँ दिल्लीमा मंसिर ११ देखि शुरु भएको थियो ।

डा.लामा आईबीसी स्थापनाकालदेखि सदस्यमा निर्वाचित भइ काम गर्दै आएका छन् । सन् २०११ देखि २०१६ सम्म स्थायी समिति सदस्यमा निर्वाचित भएर डा.लामाले काम गरेका छन् ।

सन् २०१७ को दोस्रो महाधिवेशनबाट अधिकार प्राप्त कार्यकारी सदस्यमा पुन: निर्वाचित भएर सचिवमा निर्वाचित भएका डा.लामा आईबीसीको स्थायी कार्यकारी समितिमा निर्वाचित हुँदै अध्यक्ष पदमा निर्वाचित भएका छन् ।

भारत सरकारको मातहतमा रहेको आईबीसीले सय करोडभन्दा धेरै बुद्धिष्टहरूलाई एकता गर्दै विश्वभर शान्ति स्थापनको निम्ति विभिन्न कार्यक्रमहरू अगाडि बढाउँदै आएको छ ।

बुद्धिष्टसंग सम्बन्धित रहेका पुरात्वातिक क्षेत्रहरूको खोज तथा अनुसन्धान गर्दै सम्बन्धित क्षेत्रहरूको संरक्षण र सम्बर्द्धन गर्दै आएको छ ।

बुद्धदर्शनको विकासका साथै संसारभरि छरिएररहेका बुद्धधर्म अवलम्बीहरूमा विकृति विसंगति र धर्म परिवर्तन गर्ने जस्तो अस्वभाविक अवस्था आउन नदिन आईबीसीले विशेष भूमिका खेल्नेछ ।

युगौदेखि विभिन्न खाले उत्पीडन र अत्याचार व्यहोर्दै आएका बुद्धिष्टहरूलाई न्याय दिलाउन सबै प्रकारको उत्पीडन अन्त्यको लक्ष्य समेत आईबीसीले राखेको छ ।

नयाँ दिल्लीमा रहेको बुद्धिष्टहरूको छाता संगठन जसले विश्वभरिका बौद्धमार्गीहरूको साझा मञ्चको रूपमा काम गर्दै आइरहेको छ ।

हाल ३९ देशहरूमा ३२० भन्दा बढी संगठनहरू आईबीसीको रहेको छ ।

पत्रकारहरूसँग कुरा गर्दै डा.लामाले आफू आईबीसीको अध्यक्ष पदमा निर्वाचित भएपछि बुद्धको जन्मस्थल पवित्र भूमि नेपालको सम्मान गरेको प्रतिक्रिया दिएका छन् ।

लामो समयदेखि बुद्ध दर्शनको खोज अनुसन्धान र अभ्यास गर्दै आएका उपाध्यक्ष डा.लामा सोमबार स्थायी कार्यकारी समिति हुँदै अध्यक्ष पदमा निर्वाचित भएका हुन् ।

कोषका उपाध्यक्ष डा.लामा बौद्धधर्मको विकास र सम्बर्द्धनमा अतुलनीय योगदान पुर्‍याएका व्यक्ति हुन् । बुद्ध दर्शनमा लेख एवम् प्रवचन दिई नेपाल र लुम्बिनीको पहिचान विश्वभरका बौद्धमार्गीहरूमा पुर्‍याएका छन् ।

आईबीसीको अध्यक्ष जस्तो गरिमामय पदमा निर्वाचित भएको भन्दै विभिन्न संघ संस्थाले डा.लामालाई बधाई एवम् शुभकामना दिएका छन् ।

डा.लामा अध्यक्षमा निर्वाचित भएसँगै कपिलवस्तुको तिलौराकोटलाई विश्वसम्पदा सूचीमा सूचीकरण हुन थप सहयोग पुर्‍याउने अपेक्षा गरिएको छ ।