काठमाडौं । नेपाल विद्यार्थी संघ (नेविसंघ)ले भूकम्प प्रभावितलाई १६ लाख रुपियाँ बराबरको राहत सामग्री वितरण गरेको छ ।

बिहीबार नेविसंघका अध्यक्ष दुजाङ शेर्पाले जाजरकोटको खलंगामा पत्रकार सम्मेलन गरेर राहत वितरण, उद्धार र पुन:स्थापनाका विषयमा सरकारको थप सक्रियता आवश्यक रहेको बताए । उनले भूकम्प प्रभावितसँगै सबै पक्षसँग समन्वय आवश्यक देखिएको बताएका छन् ।

भूकम्पबाट जाजरकोट र रुकुमपश्चिममा गरी ३९८ विद्यालय पूर्णरुपमा क्षतिग्रस्त भएको शेर्पाले बताएका छन् ।

तिहारपछि विद्यालय सञ्चालन हुने बेलासम्म विद्यालय सञ्चालनको वातावरण बनाउन शेर्पाले सरकारसँग आग्रह गरेका छन् ।

नेविसंघले भेरी नगरपालिका–३ स्थित हनुमान प्राथमिक विद्याय र नलगाड नगरपालिका–५ स्थित नेपाल राष्ट्रिय प्राथमिक विद्यालयको सम्पूर्ण पुनर्निर्माण गर्ने शेर्पाले घोषणा गरेका छन् ।

नेविसंघले अस्पतालमा उपचाररत भूकम्पका घाइते र कुरुवालाई कम्बल, म्याट्रेस, हर्लिक्स, फलफूल, बिस्कुटलगायतका सामग्री उपलब्ध गराएको र २४ घण्टे रक्तदान कार्यक्रम सञ्चालन गरेको जनाएको छ । आइतबार साँझसम्म ६२ जनाले रक्तदान गरेका छन् ।

नेविसंघले घाइतेहरूको उपचारमा सहयोग गर्न डा नरेश भट्टको संयोजकत्वमा स्वास्थ्यकर्मीको समूह परिचालन गरेको छ । यसबाहेक नेविसंघले प्रधानमन्त्री दैवीप्रकोप राहत कोषमा ७ लाख रुपियाँ सहयोग गर्ने घोषणा गरेको छ ।