मुम्बई । बलिउड अभिनेता सन्नी देओलको ‘गदर २’ ले भारतीय बक्स अफिसको कमाइमा उथलपुथल ल्याइदिएको छ ।

प्रदर्शनको ३० दिनपछि पनि ‘गदर २’ को कमाइ रोकिएको छैन । अगस्ट ११ मा रिलिज भएदेखि ‘गदर २’ ले रेकर्ड बनाएको छ । कमाइको हिसाबले गदर २ ले धेरैलाई पछि छाडेको छ ।

‘गदर २’ ले एसएस राजामौलीको ‘बाहुबली २’ को रेकर्ड पनि तोडेको छ । कमाइसँगै ‘गदर २’ भारतमा सबैभन्दा धेरै कमाउने हिन्दी फिल्म बनेको छ । बक्स अफिसमा अक्षय कुमार र पंकज त्रिपाठीको ‘ओएमजी २’ र आयुष्मान खुरानाको ‘ड्रिम गर्ल २’ पनि छन् ।

‘गदर २’ र ‘जवान’जस्ता ठूला सुनामी ल्याएका दुई फिल्मको बीचमा ‘ओएमजी २’ हराएको छ । ‘ड्रिम गर्ल २’ कुनै न कुनै रूपमा चलिरहेको छ ।

सन्नी देओल र अमीषा पटेलको शीर्ष भूमिका रहेको फिल्म ‘गदर २’ ले भारतीय बक्स अफिसमा प्रदर्शनको ३० दिन पूरा गरेको छ । यो अवधिमा गदर २ ले बाहुबलीको रेकर्ड तोडेको छ ।

गदर २ ले ३० दिनमा ५१२.३५ करोड भारु कमाएको छ । प्रभासको ‘बाहुबली २’ ले ५१०.९९ करोड ग्रस कलेक्सन गरेको थियो । सन् २०१७ मा रिलिज भएको ‘बाहुबली २’ फिल्ममा तमन्ना, नस्सर, सत्यराज, राम्या कृष्णन र राना दग्गुबतीको अभियन थियो ।

‘गदर २’ को नजर शाहरुख खानको ‘पठान’मा छ । जसले देशव्यापी रुपमा ५२४.६२ करोड भारु कमाएको थियो । ड्रिमगर्ल २ ले भारतीय बक्स अफिसमा १०० करोड कमाउने तर्खरमा छ । अक्षय कुमार र पंकज त्रिपाठीको फिल्म ‘ओएमजी २’ ले १४९.३७ करोड कमाइसकेको छ ।