काठमाडौं । सत्तारुढ नेपाल कम्युनिस्ट पार्टी (नेकपा) विभाजन भएपछि चीनले काठमाडौं पठाएको चिनियाँ कम्युनिस्ट पार्टी (सीपीसी)का अन्तर्राष्ट्रिय विभागका उप–प्रमुख गुओ येचौ नेतृत्वको चार सदस्यीय टोलीले भेटघाटलाई तीब्रता दिएको छ ।

यैचौको टोलीले सोमबार नेकपाका अध्यक्ष पुष्पकमल दाहाल ‘प्रचण्ड’ र माधवकुमार नेपाललाई भेट गरेको छ । येचौको टोलीले दाहाल र नेपाललाई अलग–अलग भेट गरेको स्रोतले जनाएको छ ।

चिनियाँ टोलीले खुमलटारस्थित निवासमै पुगेर दाहालसँग भेट गरेको हो । अर्का अध्यक्ष नेपालसँग नयाँ बानेश्वरस्थित होटल एभरेष्टमा भेट गरेको जनाइएको छ ।

चिनियाँ टोलीले राष्ट्रपति विद्यादेवी भण्डारी र प्रधानमन्त्री तथा नेकपा अध्यक्ष केपी ओलीसँग बालुवाटारमा भेट गरेको थियो ।

चिनियाँ टोली आइतबार दिउँसो करीब साढे एक बजे चाइना एयरको विशेष विमानबाट काठमाडौं आएको थियो ।

येचौ नेतृत्वको टोली चिनियाँ राष्ट्रपति सी जिङपिङको सन्देश लिएर काठमाडौं आएको जनाइएको छ ।

पुस ७ गते नेकपा विभाजन भएपछि तनावमा परेको चीनले विशेष टोली काठमाडौं पठाएर नेकपाको विवाद समाधानको प्रयास गर्न खोजेको आरोप छ ।

नेपालका लागि चिनियाँ राजदूत होउ यान्छीले नेकपाको विवाद मिलाउन नसकेपछि बेइजिङबाट चिनियाँ कम्युनिस्ट पार्टीका विदेश विभागका उप–प्रमुख येचौको नेतृत्वमा चार सदस्यीय टोली आएको जनाइएको छ ।