काठमाडौं । सरकार भ्रष्टाचारी, दलाल, बलात्कारीको संरक्षक भएको भन्दै कमिसनखोर सरकारको विरोधमा युवाहरूले प्रदर्शन गरेका छन् ।

सरकारले सुनियोजित र नीतिगत रुपमै भ्रष्टाचारलाई संस्थागत गर्दा समेत अख्तियार दुरुपयोग अनुसन्धान आयोग मुकदर्शक बनेको भन्दै युवाहरूले सोमबार विरोधस्वरुप अख्तियार परिसर घेराउ गरेका हुन् ।

राप्रपा (संयुक्त) सम्वद्ध विधार्थी संगठन र युवक संगठनद्वारा आयोजित विरोध कार्यक्रमको दौरान युवाहरूले मुलुकमा व्याप्त भ्रष्टाचारको विरोध गर्दे अख्तियार प्रवक्ता प्रदीप कोइराला समक्ष ज्ञापन पत्र बुझाएका थिए ।

ज्ञापन पत्रमा सत्ता पक्ष र प्रतिपक्षको राष्ट्रिय सहमति रहेको वाइड बडी जहाज खरिद प्रकरण, बालुवाटार जग्गा काण्ड लगायतका अनियमिततामा कारवाहीको माग गरिएको छ ।

राप्रपा (संयुक्त) कार्यसम्पादन समितिका सदस्य तथा विधार्थी संगठनका संयोजक जगत गौचनले घेराउ कार्यक्रमलाई सम्बोधन गर्दै सरकारकै नेतृत्व र संरक्षणमा भ्रष्टाचार जीवन पद्धति बनाइएकोमा आपत्ति जनाए ।

नेता गौचनले भने, ‘दुइतिहाईको कम्युनिष्ट सरकारले प्रजातन्त्र र राष्ट्रियतामाथि धावा बोलीरहेको छ । नेपाललाई पराधिन बनाउने दुष्प्रयास जारी रहेको यस बखतमा ६२, ६३ मा आन्दोलनकारी र राजाबीच भएको सहमति कार्यान्वयन गरिनु पर्दछ । त्यसो नभए हामी तेस्रो जनआन्दोलन गर्नेछौं ।’

युवा विधार्थीले नक्साल गहना पोखरीदेखि अख्तियार परिसरसम्म नारा जुलुस गरेका थिए । भ्रष्टाचारीलाई सख्त कारवाहीको माग गर्नुका साथै राजसंस्था र हिन्दु राष्ट्रको पक्षमा नाराबाजी गरेका थिए ।

‘दुइतिहाईको कम्युनिष्ट शासनमा एकपछि अर्को भीमकाय भ्रष्टाचार काण्डले देश आक्रान्त छ । वाइड बडी, एनसेल, मेलम्ची, सरकारी जग्गा व्यक्तिको नाममा सार्ने प्रकरण प्रतिनिधि पात्र मात्र हुन्’, राष्ट्रिय प्रजातान्त्रिक युवक संगठन (संयुक्त) का अध्यक्ष राजु लोहनीले भनेका छन् ।

‘सरकारको नीतिगत भ्रष्टाचारले देश डामाडोल छ । यस्तो रवैया युवाहरुको भविष्य माथिको प्रहार हो । यसकारण भयंकर आँधी तुफान ल्यायर भ्रष्टाचारीलाई सडकमा ल्यायर जनताले कारवाही गर्नु पर्दछ । त्यो दिन अब धेरै टाढा छैन र त्यस्तो दिन नआएसम्म हाम्रो भ्रष्टाचार विरोध अभियान जारी रहनेछ’, राप्रविसं (संयुक्त) का प्रवक्ता एन्टीसंघर्ष राईले बताए ।

भ्रष्टाचार संस्थागत रुपमा विकेन्द्रीकरण भइरहेको छ । सरकार भ्रष्टाचारले डुङडुङ गनाई रहेको छ । यस्तो समयमा पनि अख्तियार केही नदेखे, नसुने जस्तो गरेर बस्नु चिन्ताको विषय हो भ्रष्टाचार विरोधी अभियन्ताहरूको भनाई छ ।