गोरखा । नेपालको चेपाङ समुदायका बालबालिकाहरूको शिक्षा सुधारमा योगदान पुर्‍याउने क्रममा गैर आवासीय नेपाली संघ (एनआरएनए) स्पेनको महिला फोरमले गोरखा जिल्लाको गण्डकी गाउँपालिकामा अवस्थित प्रजा ज्योति आधारभूत विद्यालयलाई शैक्षिक सामग्री हस्तान्तरण गरेको छ ।

स्पेनमा बसेर पनि मातृभूमिको सेवा गर्ने भावनाका साथ आयोजित यो कार्यक्रमले स्थानीय समुदायमा आशा जगाएको छ ।

एनआरएनए स्पेनका पूर्व अध्यक्ष तथा हाल अन्तर्राष्ट्रिय समन्वय परिषद् (आइसीसी)का सचिव चिन्तामणि सापकोटाले एनआरएनए स्पेन महिला फोरमको तर्फबाट विद्यालयलाई सामग्रीहरू हस्तान्तरण गरेका हुन् । सापकोटा आइसीसीको ‘वान एनसीसी, वान च्यारिटी’ अभियानका संयोजक पनि छन् ।

अभियानले विश्वभरका एनआरएनए एनसीसीहरूलाई सामाजिक सेवामा जोड्ने लक्ष्य राखेको छ । उनले विद्यालय व्यवस्थापन समितिकी अध्यक्ष तथा वडा सदस्य कल्पना चेपाङ र प्रधानाध्यापक निर्मला अर्याल रेग्मीलाई सामग्रीहरू प्रदान गरे ।

यो विद्यालयमा मुख्य रूपमा चेपाङ समुदायका ६३ जना बालबालिकाहरू अध्ययनरत छन् । आर्थिक अभावका कारण उनीहरूको शिक्षा प्रायः प्रभावित हुने गरेको छ । हस्तान्तरण गरिएका सामग्रीहरूमा विद्यालय पोशाक, कापी, कलम लगायतका आधारभूत शैक्षिक सामग्रीहरू समावेश छन् । यी सामग्रीले बालबालिकाहरूलाई नियमित अध्ययनमा सहयोग पु¥याउने अपेक्षा गरिएको छ ।

सामग्री हस्तान्तरण कार्यक्रममा सापकोटाले महिला फोरमकी निवर्तमान संयोजक तथा हाल उपाध्यक्ष भएकी जमुना सापकोटा र उहाँको टिमले सहयोग गर्ने निर्णय गरेकाले आफूले हस्तान्तरण गरेको बताए ।

एनआरएनए स्पेनको महिला फोरमले यसअघि पनि नेपालका विभिन्न क्षेत्रमा सहयोग पु¥याउँदै आएको छ ।

सामग्री ग्रहण गर्दै विद्यालय व्यवस्थापन समितिकी अध्यक्ष कल्पना चेपाङले विद्यालयको वर्तमान अवस्थाबारे जानकारी दिइन् । विशेष गरी जन्डिस (हेपाटाइटिस) जस्ता रोगहरूका कारण धेरै बालबालिकाहरू विद्यालय आउन सक्दैनन् । यो समुदायमा गरीबी, स्वास्थ्य समस्या र पारिवारिक विघटन जस्ता चुनौतीहरू प्रबल छन्, जसले बालबालिकाहरूको भविष्यलाई जोखिममा पारिरहेको छ ।

प्रधानाध्यापक निर्मला अर्याल रेग्मीले सहयोगका लागि आभार व्यक्त गर्दै विद्यालयको शिक्षा सुधारमा आफूहरू निरन्तर प्रयासरत रहेको बताइन् । विद्यालयले स्थानीयस्तरमा स्वास्थ्य शिविर र अभिभावक जागरण कार्यक्रमहरू पनि सञ्चालन गर्ने योजना बनाएको छ ।

चेपाङ समुदाय नेपालको आदिवासी जनजातिमध्ये एक हो, जसको मुख्य बसोबास गोरखा, चितवन, मकवानपुर लगायतका जिल्लाहरूमा छ । उनीहरूको जीविकोपार्जन मुख्य रूपमा जंगल र कृषिमा निर्भर छ । जलवायु परिवर्तन र आधुनिकीकरणका कारण उनीहरूको जीवन थप कष्टकर बन्दै गएको छ । शिक्षा दर निकै न्यून रहेको यो समुदायमा बालबालिकाहरू प्रायः घरेलु काम र स्वास्थ्य समस्याका कारण विद्यालयबाट टाढा रहन्छन् ।

प्रजा ज्योति आधारभूत विद्यालय जस्ता संस्थाहरूले यस्ता बालबालिकाहरूलाई शिक्षा प्रदान गर्ने प्रयास गरिरहेका छन् । स्रोतको अभाव सधैंको समस्या हो । एनआरएनए जस्ता संस्थाहरूको सहयोगले यस्ता विद्यालयहरूलाई नयाँ जीवन दिन्छ । यसै क्रममा, ‘वान एनसीसी, वान च्यारिटी’ अभियानले विश्वभरका नेपालीहरूलाई सामाजिक सेवामा जोड्ने लक्ष्य राखेको छ, जसबाट नेपालका दुर्गम क्षेत्रहरू लाभान्वित हुने अपेक्षा छ ।