रूपनी । शेखर कोइराला समूहले मत पत्र च्यातेपछि नेपाली कांग्रेस सप्तरीको जिल्ला अधिवेशनको मतदान स्थगित भएको छ ।

शनिबार शेखर समूहले विवाद खडा गरेपछि हात हालाहालको अवस्था सिर्जना भएको थियो ।

रूपनी गाउँपालिकास्थित औद्योगिक क्षेत्रमा भइरहेको निर्वाचनमा विवाद बढ्दै गएर हात हालाहालकै स्थिति आएपछि मतदान स्थगित गरिएको हो ।

करिब ६ सय मत खसेपछि विवाद भएको थियो ।

शेखर समूहले संस्थापन पक्षका कार्यकर्ताले नक्कली मतदाता पठाएर मत हाल्न लगाएको आरोप लगाएको छ ।

विवादका क्रममा शेखर समूहले केही मतपत्र च्यातेको छ ।

विवादकै क्रममा दुई सय मतपत्र लुटिएको निर्वाचन समितिले जनाएको छ ।

शेखर समूहका नेता तेजुलाल चौधरीले संस्थापन पक्षले नक्कली मतदातालाई मत हाल्न लगाएर धाँधली गर्न खोजेको आरोप लगाएका छन् ।

केन्द्रीय सदस्य समेत रहेका संस्थापन पक्षका नेता दिनेश यादवले खुल्ला ठाउँमा निर्वाचन गर्दा यस्तो समस्या देखिएको बताए ।

उनले आफूहरूमाथि लगाएको आरोप निराधार रहेको बताएका छन् ।

सप्तरी कांग्रेसमा २५ सय ६८ मतदाता छन् । स्थगित भएको निर्वाचन कहिले गर्ने सन्दर्भमा छलफल भइरहेको निर्वाचन समितिले जनाएको छ ।