काठमाडौं । नेपाली कांग्रेसका पूर्व केन्द्रीय सदस्य एवम् प्रतिनिधि सभाका सांसद अभिशेषप्रताप शाहले १० वर्षीया बालिका निर्जल चौधरीको उपचारमा सहयोग गर्न उर्जामन्त्री पम्फा भुसालसँग आग्रह गरेका छन् ।

बिहीबार बिहान सांसद शाहले उर्जामन्त्री भुसाललाई फोन गरेर चौधरीको उपचारमा सहयोग गर्न आग्रह गरेका हुन् । शाहले चौधरीलाई क्षतिपूर्ति दिन पनि मन्त्री भुसालसँग आग्रह गरेका छन् ।

सांसद शाहको आग्रहपछि मन्त्री भुसालले बिद्युत् प्राधिकरणको कृष्णानगर कार्यालयमा निवेदन दिन आग्रह गरेकी छिन् ।

निवेदन आएपछि आफूले क्षतिपूर्तिका लागि पहिल गर्ने आश्वानि दिएको सांसद शाहले जानकारी दिएका छन् ।

कपिलवस्तु जिल्लाको विजयनगर गाउँपालिका वडा नं. २ की १० वर्षीया बालिका चौधरीले घरमाथिबाट गएको बिजुलीको तारमा झुक्किएर समात्दा करेन्ट लागेको थियो ।

करेन्ट लागेपछि उनलाई उपचारका लागि काठमाडौं ल्याइएको छ । उनको हातको औलाहरू जलेर काट्नु परेको छ । चौधरीको घरको आर्थिक अवस्था पनि अत्यन्तै नाजुक छ ।

चौधरीको स्वास्थ्य अवस्था सामान्य रहे पनि उनको हातका औँलाहरू काटिएकाले भविष्यमा उनलाई समस्या हुनेछ ।

नेपाल विद्युत प्राधिकरणले मानव बस्ती भएको स्थानमा बिजुलीको तार लैजाने क्रममा जथाभावी छाड्ने र सुरक्षाका लागि कुनै उपाय नगर्दा धेरैको ज्यान जोखिममा पर्ने गरेको छ ।