पोखरा । सत्तारुढ नेपाल कम्युनिस्ट पार्टी (नेकपा)का कार्यकर्ताहरूले नेपाली कांग्रेसका केन्द्रीय सदस्य अर्जुन जोशी बसेको होटेलमा तोडफोड गरेका छन् ।

पोखरास्थित पोखरा बुटिक होटेलको रिसेप्शनमा नेकपाका कार्यकर्ताहरूले शुक्रबार मध्यरात तोडफोड गरेका हुन् । नेपाली कांग्रेसका केन्द्रीय सदस्य जोशी सोही होटेलमा बास बसेका थिए ।

नेकपाका कार्यकर्ताहरूले मध्यराति होटलमा आएर कांग्रेसका नेता जोशी खोइभन्दै तोडफोड गरेको प्रत्यक्षदर्शी होटेलका कर्मचारीहरूले बताएका छन् ।

होटलका कर्मचारीहरूका अनुसार तोडफोडमा संलग्नहरूको भिडियो सीसी क्यामेरामा कैद भएको बताएका छन् ।

शनिबारको उपनिर्वाचनलाई निरुत्साहित गर्ने उद्देश्यले नेकपाका नेता तथा कार्यकर्ताहरूको डिजाइनमा आफूमाथि आक्रमण भएको हुन सक्ने केन्द्रीय सदस्य जोशीले बताए ।

कास्की २ मा नेपाली कांग्रेसका उम्मेदवार खेमराज पौडेल बलियो भएर अगाडि आएपछि हतासमनस्थितिमा पुगेका नेकपाका कार्यकर्ताहरूले आक्रमणको प्रयास गरेको हुन सक्ने जोशीले बताए ।