घोराही । दाङको घोराही उपमहानगरपालिका वडा नम्बर २ रामपुरको पलासेमा रहेको स्वर्गद्वारी सामुदायिक वन समूहमा नेतृत्व चयनका लागि मंगलवार भएको चुनावमा प्रजातान्त्रिक समूहका अध्यक्षसहित सबै पदमा विजयी भएका छन् ।

कांग्रेस नेता कृष्णकिशोर घिमिरे तथा कमलकिशोर घिमिरेको वन समूह भएका कारण पनि यो चुनावलाई रामपुरमा निकै चर्चाको विषयका रुपमा लिइएको थियो ।

चुनावका कांग्रेसको एउटा समूह र सत्तारुढ नेकपासहित अरु सबैको फरक समूह बनाइ प्रतिस्पर्धामा गएका थिए । स्थानीय तहमा बनको यो चुनावलाई कांग्रेस र नेकपाको उपस्थितिका रुपमा लिइएको थियो ।

चुनानको मतपरिणाम अनुसार अध्यक्षमा प्रजातान्त्रिक समूहका फूलमान चौधरी १ सय ४३ मत ल्याएर बिजयी भएका छन । प्रगतिशील समूहका निवर्तमान अध्यक्ष वीरबहादुर विकले १ सय १ मत ल्याएका छन् ।

उपाध्यक्षमा प्रजातान्त्रिक समूहका उपाध्यक्ष जगदीश चौधरी, सचिवमा रीता चौधरी र कोषाध्यक्षमा शरद केसी विजयी भएका छन् ।

सदस्यहरूमा बाधु चौधरी, मुक्ति थापा, मीनाकुमारी चौधरी, अमृता विक र सुन्दरा नेपाली विजयी भएको पलासेबाट चुडामणि आचार्यले जानकारी दिए ।

२ सय ६४ उपभोक्त रहेको उक्त वन समूहको चुनावमा २ सय ५२ मत खसेको थियो । ५ मत बदर भएको थियो ।

चुनावी परिणामपछि रामपुरमा बाजागाजासहित विजयी जुलुस निकालिएको छ ।

दाङको यो क्षेत्र नेकपाका सांसद एवम् सभामुख कृष्णबहादुर महरा र प्रदेश ५ का मुख्यमन्त्री शंकर पोखरेलको क्षेत्र पर्छ ।