काठमाडौं । प्रहरीले मानसिक रोगीलाई निर्घात कुटपिट गरेको भिडियो सार्वजनिक भएपछि प्रहरी प्रधान कार्यालयले आन्तरिक छानविन गरेको छ ।

काठमाडौंको गोंगबुमा मानसिक रोगी व्यक्तिलाई प्रहरीले निर्घात कुटपिट गरेको भिडियो सार्वजनिक भएको थियो । मानसिक रोगी ती व्यक्तिलाई कुटपिट गर्ने प्रहरीमाथि आन्तरिक छानबिन सुरु भएको हो ।

महानगरीय प्रहरी वृत्त, महाराजगञ्जका प्रहरी निरीक्षक महेन्द्र दर्नालको नेतृत्वमा ३ सदस्यीय छानबिन समिति गठन गरिएको छ ।

प्रहरीले मानसिक रोगीलाई लाठी र बुट बर्साएको भिडियो सामाजिक सञ्जालमा भाइरल भएपछि प्रहरीको ठूलो आलोचना भएको थियो ।

काठमाडौं प्रहरी परिसरका प्रमुख एसएसपी वसन्त लामाले मानसिक रोगीलाई प्रहरीले कुटपिट गरेका बारेमा सत्य तथ्य छानविन गर्न समिति बनाएको जानकारी दिए ।

गोंगबुस्थित शिव मन्दिर चोकमा गत सोमबार प्रहरीले मानसिक रोगीमाथि कुटपिट गरेका थिए । फेन्सी पसल अगाडि बसेका ती व्यक्तिलाई बिहान साढे ६ बजे स्थानीयले हटाउन खाजेका थिए । पसले र मानसिक रोगीबीच विवाद भएको थियो ।

स्थानीयले उनलाई पिटेर भगाउन खोजेका थिए । प्रहरीले झगडा छुट्टाउनुको साटो मानसिक रोगीलाई मरणासन्न हुने गरी कुटपिट गरेका थिए ।

सत्तारुढ दल नेकपा निकट लेखक दिलनिशानी मगरले भिडियो खिचेर सामाजिक सञ्जालमा हालेका थिए ।