बुटवल । बाँके जिल्लाको कोहलपुरमा प्रहरीले विद्यार्थीमाथि गरेको दमन बिरोधमा नेपाल विद्यार्थी संघ (नेविससंघ) रुपन्देहीले बुटवलमा विरोध प्रदर्शन गरेको छ ।

नेविसंघ रुपन्देही जिल्ला समितिको आयोजना र बुटवलमा बिभिन्न क्याम्पसका ईकाइको समन्वयमा मंगलबार बुटवलमा प्रदर्शन गरिएको हो । प्रदर्शनमा सहभागीहरूले प्रहरी दमनको विरोध गर्दै चर्काे नाराबाजी गरेका छन् ।

उनीहरूले गृहमन्त्री रामबहादुर थापाको समेत राजीनामा मागेका छन् ।

नेविसंघका विद्यार्थी नेताहरू मुक्तिराज पौडेल, जमुना ढकाल, टंक पाण्डे, छाँया पोख्रेल, सुरज क्षेत्री, महेश शर्मा लगायतले कम्युनिस्ट सरकारले विद्यार्थीमाथि गरेको दमन अक्षम्य भएको बताए ।

उनीहरूले गृहमन्त्री राजीनामा दे, विद्यार्थी मार्न पाइँदैन, प्रहरी दमन बन्द गर लगायतका प्ले कार्ड र नाराबाजी गरेका थिए ।

प्रदर्शनमा एम्स कलेज, स्कर्लस होम, कालिका मावि, अक्सफोड कलेज लगायतका विद्यार्थीको बाक्लो सहभागिता रहेको थियो ।

अस्पताललाइनबाट शुरु भएको विद्यार्थीको प्रदर्शनले बजार परिक्रमा गरेको थियो ।

नेविसंघको प्रदर्शन मिलनचोकमा पुगेर कोणसभामा परिणत भएको थियो ।

कोणसभामा बोल्ने नेविसंघका नेताहरूले कम्युनिस्ट सरकारको लाचारीपनका कारण स्कुले विद्यार्थीले पीडा भोग्नुपरेको बताएका छन् ।

उनीहरूले कम्युनिस्ट सरकारले संविधान विपरित कदम चालेको भन्दै कार्यशैली सच्चाउन चेतावनी दिएका छन् ।

आइतबार बिहान ट्रकले ठक्कर दिँदा कक्षा सातमा अध्ययनरत कोहलपुर—१० की प्रकृति चन्द गम्भीर घाइते भएकी छिन् ।

दुर्घटनाको विरोधमा नेपालगञ्ज—कोहलपुर सडकखण्डमा प्रदर्शनकारी र प्रहरीबीच झडप भएको थियो । प्रहरीले विद्यार्थीमाथि चरम दमन गरेको थियो ।