काठमाडौं । उपनिर्वाचनको टिकट वितरणका लागि नेपाली कांग्रेसका पदाधिकारीहरूको बैठक बसिरहेको छ ।

नेपाली कांग्रेसका सभापति शेरबहादुर देउवाको निवास बुढानिलकण्ठमा बसिरहेको पदाधिकारीहरूको बैठकमा उम्मेदवारहरूका बारेमा छलफल केन्द्रित रहेको प्रवक्ता विश्वप्रकाश शर्माले जानकारी दिए ।

कास्कीमा प्रतिनिधि सभा तथा दाङ र भक्तपुरमा प्रदेशतर्फको उपनिर्वाचन हुँदै छ ।

कास्की क्षेत्र नम्बर २ मा उपनिर्वाचन हुँदै छ । नेपाली कांग्रेसका तर्फबाट धनराज गुरुङ, देवराज चालिसे र खेमराज पौडेलेको नाम चर्चामा छ । प्रवक्ता शर्माले भने, ‘छलफल जारी छ । तीन ‘राज’मध्येबाट एक ‘राज’ले टिकट पाउने पक्का छ ।’

दाङको ३ ‘ख’मा नेपाली कांग्रेसका केशव आचार्य र शंकर डाँगीको नाम अग्रपंक्तिमा चर्चामा रहेको छ ।

भक्तपुर क्षेत्र नं. १ ‘क’मा नेपाली कांग्रेसका नेताहरू कृष्णलाल भडेल, यादवप्रसाद अधिकारी, सुरेश श्रेष्ठको नाम चर्चामा छ ।

प्रवक्ता शर्माले नेताहरूको बीचमा छलफल चलिरहेकाले केही समयपछि अन्तिम निर्णय गरिने बताए । उनले चर्चामा रहेकै नामबाट टिकट दिइने र जित सुनिश्चित गर्ने बताएका छन् ।