सवारीसाधन रोकेको विषयमा वीरगञ्जमा विवाद, दुई समुदायबीच झडप

वीरगञ्ज । पर्साको वीरगञ्जमा सवारीसाधन रोकेको विषयलाई लिएर विवाद हुँदा दुई समुदायबीच झडप भएको छ ।

आइतबार साँझ सडक पेटीमा जीप रोक्दा पछाडिबाट आएको मोटरसाइकललाई अवरोध पुगेपछि शुरु भएको सामान्य भनाभनले उग्र रूप लिँदा झडप भएको हो ।

पर्साका एसपी नरेश सुवेदीका अनुसार एक व्यक्तिले आफ्नो घर अगाडि सडक छेउमा जीप रोकेका थिए । सोही क्रममा पछाडिबाट आएको मोटरसाइकललाई अगाडि बढ्न अवरोध भएपछि मोटरसाइकल चालकले हर्न बजाएका थिए ।

बाटो छेकेको विषयलाई लिएर दुवै पक्षबीच कुराकानी हुँदाहुँदै विवाद शुरु भएको थियो । विवाद बढ्दै गएपछि घटनास्थलमा करिब दुईदेखि चार सयको हाराहारीमा मानिसहरू जम्मा भएर होहल्ला गर्दै सामान्य ढुंगामुढासमेत गरेका थिए ।

स्थिति तनावपूर्ण बन्न नदिन प्रहरीले तत्कालै सामान्य बल प्रयोग गरेर स्थितिलाई नियन्त्रणमा लिएको एसपी सुवेदीले जानकारी दिएका छन् ।

Published : Sunday, 2026 February 22, 9:53 pm