नुवाकोट । राष्ट्रिय स्वतन्त्र पार्टी (रास्वपा) नुवाकोटका नेता अशोककुमार थापाले पार्टी परित्याग गरेका छन् ।

शनिबार सामाजिक सञ्जालमार्फत रास्वपा परित्याग गरेको जनाएका हुन् । थापाले पार्टी विचार र सिद्धान्तबाट विचलित हुँदै गएको तथा नेतृत्व नीतिभन्दा आशीर्वादका आधारमा चयन हुन थालेको आरोप लगाएका छन् ।

संगठन निर्माणमा सक्रिय कार्यकर्तालाई पाखा लगाउँदै पार्टी अलोकतान्त्रिक बन्दै गएको अवस्थामा बसिरहनु उचित नदेखिएको उनले उल्लेख गरेका छन् ।

२०७९ सालको निर्वाचनदेखि रास्वपा नुवाकोटका जिल्ला सदस्य तथा बिदुर नगर इन्चार्जका रूपमा सक्रिय थापा सोही वर्ष नुवाकोट क्षेत्र नम्बर २ का उम्मेदवार रहेका सुमनबिक्रम पाण्डे निकट मानिन्थे ।

सहकारी ठगीका अभियुक्त रास्वपाका सभापति रवि लामिछाने र वरिष्ठ नेता बालेन्द्र शाह (बालेन) देश दौडाहामा रहेका बेला नुवाकोटका रास्वपाका नेता थापाले पार्टी छाडेका छन् ।