तौलिहवा । नेपाली कांग्रेसका युवा नेता एवम् कपिलवस्तु क्षेत्र नं. ३ का उम्मेदवार अभिषेकप्रताप शाहले पार्टीका आधिकारिक उम्मेदवारहरूलाई मतदान गरेर विजयी बनाउन अनुरोध गरेका छन् ।

शनिबार तौलिहवामा बसेको नेपाली कांग्रेस, कपिलवस्तुको जिल्ला कार्यसमितिको बैठकमा सम्बोधन गर्दै नेता शाहले पार्टीले टिकट दिएपछि आधिकारिक उम्मेदवारहरूलाई बिगतका तिक्तताहरू बिर्सिएर विजयी बनाउन आग्रह गरे ।

उनले भने, ‘बिगतमा जे भयो भयो । अहिले पार्टीका आधिकारिक उम्मेदवारहरूलाई जिताउने गरी हामी कम्मर कसेर लाग्नु पर्छ । जिल्ला कार्यसमिति, क्षेत्र, नगरले बैठक बोलाउँदा हामी उपस्थित हुने छौं ।’

‘हामीले पार्टीको टिकट लिएर आएका छौं । हरेक वडाका, हरेक गाउँबाट नेपाली कांग्रेसका सम्पूर्ण उम्मेदवारहरूलाई आ–आफ्नो तर्फबाट, आ–आफ्नो क्षेत्रबाट, आ–आफ्नो वडाबाट, आ–आफ्नो ठाउँबाट हामीलाई सहयोग गर्नु हुन अनुरोध छ,’ नेता शाहले भने ।

‘तीन वटै क्षेत्रका तीन जना उम्मेदवारहरू जिताउने गरी हाम्रो अभियान चलाउनुपर्छ । जिल्लाले आफ्नो अभियान चलाउनुपर्छ । क्षेत्रले आफ्नो अभियान चलाउनुपर्छ । वडाले आफ्नो अभियान चलाउनुपर्छ । नगरले आफ्नो अभियान चलाउनुपर्छ,’ उनले भने ।

कांग्रेसका युवा नेता शाह कपिलवस्तु क्षेत्र नं. ३ बाट प्रतिनिधि सभा सदस्यमा उम्मेदवार बनेका छन् । चुनावी प्रचार प्रसारमा रहेका नेता शाहले कपिलवस्तुको ३ क्षेत्रका उम्मेदवारहरू विजयी गराएर एकताको सन्देश दिनुपर्ने बताए ।