पोखरा । नेपाल प्रहरीका प्रहरी महानिरीक्षक (आईजीपी) दानबहादुर कार्कीले अमर प्रहरी सहायक हवल्दार अमृत गुरुङको पत्नीसँग भेट गरेर जागिरको लागि प्रस्ताव गरेका छन् ।

आइतबार कास्की जिल्लास्थित स्व.गुरुङ निवासमा पुगेर आईजीपी कार्कीले उनकी पत्नीलाई जागिरका लागि सहयोग गर्ने आश्वासन दिएका हुन् । आईजीपी कार्कीले भने, ‘मैले उहाँ (प्रहरी सहायक हवल्दार स्व.अमृत गुरुङकी पत्नी)लाई उहाँकै सुविधा अनुसार पोखरामा जागिरको प्रस्ताव गरेको छु ।’

भदौ २३ र २४ गतेको जेनजी प्रदर्शनपछि प्रहरीको मनोबल कमजोर भइरहेका बेला आईजीपी कार्कीले प्रहरी कर्मचारीहरूको कमजोर मनोबल उच्च बनाउन प्रयासहरू गरिरहेका छन् । आईजीपी कार्कीले स्व.गुरुङकी पत्नी र परिवारका सदस्यहरूलाई कमजोर महसुस नगर्न आग्रह गरेका छन् ।

काठमाडौंबाट पोखरा आएका आईजीपी कार्कीले प्रहरी सहायक हवल्दार स्व.गुरुङका आफन्तलाई भेट गरेका हुन् । आइतबार आईजीपी कार्कीसहितको टोली कास्कीमा रहेको स्व.गुरुङको निवासमा पुगेर परिवारसँग भेट गर्नुका साथै तस्बिरमा श्रद्धाञ्जलि व्यक्त गरेका छन् । स्व.गुरुङको सानो बच्चा पनि छ ।

प्रहरी प्रभाग, कोटेश्वर, काठमाडौंमा कार्यरत रहेका प्रहरी सहायक हवल्दार गुरुङले गत भदौ २४ गते भएको जेनजी आन्दोलनका क्रममा अमरत्व प्राप्त गरेका थिए ।

भदौ २४ गते जेनजी आन्दोलनका नाममा भएको प्रदर्शनका क्रममा प्रहरी सहायक हवल्दार गुरुङको प्रदर्शनकारीले हत्या गरेका थिए ।

आईजीपी कार्कीले मृतकका परिवारलाई सान्त्वना दिदैँ प्रहरी संगठन र राष्ट्रका लागि प्राण उत्सर्ग गर्ने वीर सपूतको अभिभावक हुनुमा गर्व गर्नुपर्ने बताएका छन् ।

प्रहरी महानिरीक्षक कार्कीले प्रहरी संगठनले प्रहरी सहायक हवल्दार स्व.गुरुङको बलिदान कदापी नबिर्सने प्रतीज्ञा व्यक्त गरेका छन् ।

जेनजी आन्दोलनको क्रममा अमरत्व प्राप्त गरेका कास्कीको रुपा गाउँपालिका–५, रामदी घर भएका गुरुङको जन्म वि.सं. २०५२ साल पौष १० गते भएको थियो । गुरुङ २०७० साल असोज १५ गतेदेखिबाट नेपाल प्रहरी संगठनमा आवद्ध रहेका थिए ।

प्रहरी सहायक हवल्दार गुरुङका परिवारसँगको भेटघाटमा गृहमन्त्री ओमप्रकाश अर्याल, गृहसचिव रामेश्वर दंगाल, गण्डकी प्रदेशका प्रमुखसचिव डण्डुराज धिमिरे तथा कास्कीका प्रमुख जिल्ला अधिकारी रुद्रादेवी शर्मा समेत सहभागी रहेका थिए ।