काठमाडौं । नेपाली कांग्रेसले काभ्रेपलाञ्चोक कांग्रेसका सभापति तीर्थबहादुर लामालाई पितृ शोक परेको भन्दै गहिरो दुःख व्यक्त गरेको छ ।

सोमबार कांग्रेस केन्द्रीय कार्यालयका मुख्यसचिव कृष्णप्रसाद पौडेलले शोक वक्तव्य जारी गरेर बागमती प्रदेश सभाका सदस्य तीर्थबहादुर लामाका पिता केशरबहादुर लामाको निधनप्रति गहिरो दुःख व्यक्त गरेका हुन् ।

‘स्वर्गीय लामाले नेपालको लोकतान्त्रिक आन्दोलनमा सक्रिय भूमिका निर्वाह गर्नु भएको थियो । उहाँको निधनबाट नेपाली कांग्रेसले एक अग्रज व्यक्तित्वलाई गुमाएको छ,’ शोक वक्तव्यमा भनिएको छ ।

स्व.केशरबहादुर लामाप्रति कांग्रेसले भावपूर्ण श्रद्धाञ्जलि अर्पण गर्दै आत्माको चीर शान्तिको कामना साथ शोक सन्तप्त परिवारजनप्रति गहिरो समवेदना प्रकट गरेको छ ।

सोमबार स्व.केशरबहादुर लामाको गृहजिल्ला काभ्रेपलाञ्चोकमा अन्तिम दाहासंस्कार गरिएको छ । स्व.केशरबहादुर लामालाई परिवारजन र कांग्रेसका नेता तथा कार्यकर्ताहरूले पनि अन्तिम श्रद्धाञ्जलि व्यक्त गरेका थिए ।