काठमाडौं। जेनजी आन्दोलन हाइज्याक गरेकाे तथा बारबर फाउन्डेसन लगायतका अमेरकन लगानीका एनजीओबाट सञ्चालित जेनजीका नेता सुदन गुरुङ राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकमा सहभागी भएर निर्देशन दिएका छन् ।

शनिबार सिंहदरबारस्थित प्राधिकरणकाे कार्यालयमा बसेकाे बैठकमा सहभागी भई गुरुङले प्राधिकरणका प्रमुख कार्यकारी अधिकृत दिनेशप्रसाद भट्ट लगायतलाई विपद् उद्धारसँग सम्बन्धित विषयमा निर्देशन दिएका हुन् ।गुरुङ आफैले सार्वजनिक गरेको भिडियोमा कर्मचारीहरूलाई निर्देशन दिँदै गरेको देखिएको छ ।

गुरुङले आँखाका चिकित्सक डा.सन्दुक रुइतसँग बारबर फाउन्डेसनबाट रकम लिएर काम गरेकोे बताइसकेका छन् । गुरुङ नक्कली जेनजी बनेर जेनजी आन्दोलन हाइज्याक गरेको आराेप लाग्दै आएकाे छ ।

उनले कर्मचारीहरूलाई ठाडो निर्देशन दिँदै भनेका छन्, ‘ जहाँ-जहाँ मान्छे अड्केका छन्, त्यसको पहिचान हुन सकेका छैनन्, त्यो पहिले पहिचान हुनुपर्‍यो नि । तब तपाईंहरूले यो–यो ठाउँमा मान्छे अड्किएको छ, सेल्टर बनाएर राख्दिनुपर्‍यो भनेर भन्न सकिन्छ, बरु राज्यले के गर्नुपर्छ त्यसमा हामी पछि हेर्दिउँला, रासनपानी के-के हुन्छ, यसो मिलाइदिनु पर्ला । किनभने, त्यहाँ खाना छैन ।‘

गुरुङले एम्बुलेन्सलाई पनि पहिलो प्राथमिकतामा राख्नुपर्ने माग गरेका छन् । ‘कम्तीमा त्यहाँ एम्बुलेन्स छ कि छैन भन्ने निर्क्योल गर्नुपर्‍यो । त्यसपछि उद्धार गर्नुपर्‍यो,‘ उनले भने । उनले विपद् उद्धारका लागि प्राधिकरणसँग कति टेन्ट छ ? भनेर सोधेको पनि देखिन्छ । जवाफमा प्रमुख कार्यकारी अधिकृत भट्टले ‘केही टेन्टहरू टीआईएमा छ, भएका टेन्टहरू प्रदेश सरकारलाई हस्तान्तरण गरेका बताएका छन् ।

यसका साथै गुरूङले अब सशस्त्र प्रहरीको ‘रिलोकेसन सेन्टर‘मा पनि रासनलगायत तयारी अवस्थामा राख्नुपर्ने औल्याएका छन् । गुरुङले स्वास्थ्य शिविरलगायत समेत तत्काल गर्नुपर्ने हुनसक्ने भन्‍दै कतिवट मोटरबोट रहेको भनेर प्रश्‍न सोधेको देख्‍न सकिन्छ। जवाफमा डीएसपीले आफूहरुसँग ९६ र्‍याफ्ट र ३३ मोटरबोट रहेको बताएका छन् ।

जेनजीका नेता गुरुङले विपद् प्राधिकरणका सीईओलाई पनि हवाई उद्धारबारे प्रश्न सोधेका छन् । भट्टले सेनाका हेलिकप्टर परिचालन भइरहेको जानकारी दिएका छन् ।

गुरुङको हैसियत र अौकातलाई लिएर सामाजिक सञ्जालमा आलोचना भइरहेको छ । गुरुङलाई अमेरिकन दलाल भन्दै टिप्पणीहरू भइरहेका छन् । सामाजिक सञ्जालमा पत्रकार प्रकाश तिमल्सिनाले गुरुङ प्राधिकरणकाे बैठकमा सहभागी भएको विषयमा विभिन्न लाञ्छना लगाउँदै कठाेर टिप्पणी गरेका छन् ।