काठमाडौं । नेपाली कांग्रेसका सभापति शेरबहादुर देउवाले पार्टीको कार्यवाहक सभापतिको जिम्मेवारी उपसभापति पूर्णबहादुर खड्कालाई दिएका छन् ।

आइतबार सभापति देउवाले खड्कालाई कार्यवाहक सभापति तोकेको मुख्यसचिव कृष्णप्रसाद पौडेलद्वारा जारी विज्ञप्तिमा उल्लेख छ ।

‘नेपाली कांग्रेसका सभापति शेरबहादुर देउवा देश बाहिर प्रस्थान गर्नु भएकोले नेपाली कांग्रेसको विधान, २०१७ (संशोधन सहित) को धारा २५ को उपधारा (१३) बमोजिम स्वदेश नफर्कुञ्जेलसम्मका लागि नेपाली कांग्रेसका उपसभापति एवं केन्द्रीय नीति, अनुसन्धान तथा प्रशिक्षण प्रतिष्ठानका प्रमुख पूर्णबहादुर खड्कालाई पार्टीको कार्यवाहक सभापति तोक्नु भएको छ’, विज्ञप्तिमा भनिएको छ ।

कांग्रेसका सभापति एवम् पूर्वप्रधानमन्त्री देउवा उपचारका लागि थाइल्याण्ड प्रस्थान गरेका छन् । थाइल्याण्डको राजधानी बैंककमा सभापति देउवाको आँखा र पेटको नियमित परीक्षण हुनेछ ।