काठमाडौं । नेपाली कांग्रेसले सभापति शेरबहादुर देउवाले महासमितिको बैठकको तयारीका लागि उप–समितिहरूका संयोजकहरू तोकेका छन् ।

महासमितिको बैठक तयारी मूल समितिका संयोजक एवम् पार्टी सभापति देउवाले विभिन्न आठ वटा उप–समितिहरू गठन गरेका छन् ।

फागुन ७ गते कांग्रेसको महासमितिको बैठक ललितपुरको गोदावरीमा हुन लागेको छ । उप–समितिको संयोजक हुनेहरूमा अधिकांश ललितपुरका नेताहरू छन् ।

प्रचार प्रसार उप–समितिको संयोजकमा मीनबहादुर विश्वकर्मा, आवास समन्वय उप–समितिको संयोजकमा मदनबहादुर अमात्य, भोजन व्यवस्थापन उप–समितिको संयोजकमा उदयशम्शेर राणा, यातायात व्यवस्थापन उप–समिति धना खतिवडालाई मनोनयन गरिएको कांग्रेसका मुख्यसचिव कृष्णप्रसाद पौडेलद्वारा जारी विज्ञप्तिमा उल्लेख छ ।

स्वयंसेवक परिचालन उप–समितिमा जीतजङ्ग बस्नेत, स्वास्थ्य समन्वय उप–समितिमा उर्मिला नेपाल केसी, प्रदेश समन्वय उप–समितिमा ईन्द्रबहादुर बानियाँ र स्थानीय व्यवस्थापन उप–समितिमा जितेन्द्र श्रेष्ठ (जिल्ला सभापति, ललितपुर)लाई सभापति देउवाले जिम्मेवारी दिएका छन् ।

महासमिति बैठक व्यवस्थित एवम् प्रभावकारी बनाउन तोकिएको जिम्मेवारी संयोजकहरूले कुशलतापूर्वक निभाउने विश्वास सभापति देउवाले लिएका छन् ।