अदालतको आदेशले एनसेलको हावा खुस्कियो, ठूलो घोटाला हुने खतरा

काठमाडौं । उच्च अदालत पाटनले एनसेलको सेयर खरिदबिक्री रोक्न अल्पकालीन अन्तरिम आदेश दिएको छ ।

बिहीबार उच्च अदालत पाटनका न्यायाधीश पुरुषोत्तमप्रसाद ढकालको इजलासले कम्पनी रजिष्ट्रारको कार्यालय, त्रिपुरेश्वरलगायतलाई एनसेलको सेयर बिक्री रोक्नका लागि अल्पकालीन अन्तरिम आदेश जारी गरेको हो ।

उच्च अदालत पाटनले एनसेल खरिद–बिक्री सम्बन्धमा परेको रिटमाथि सुनुवाइ गरेको थियो । अधिवक्ता गोकुलबहादुर रोकायाले रिट निवेदन दायर गरेका थिए ।

अन्तरिम आदेशका लागि दुवै पक्षलाई उच्च अदालत पाटनले मंसिर २५ गते बोलाएको छ ।

अन्तरिम आदेशका लागि छलफलमा आउँदा एनसेलको खरिद–बिक्रीबारे भएका निर्णय साथमा ल्याउन अदालतले आदेश दिएको छ ।

एनसेलले सेयर बिक्री गरेर ठूलो घोटाला गर्न लागेको छ । घोटाला गर्न लागेपछि विरोध भइरहेको छ । सरकारले पनि एनसेलको सेयर बिक्री प्रकरणमा छानविन गर्न समिति नै बनाइसकेको छ ।