काठमाडौं । लुम्बिनीस्थित मायादेवीको मुख्य मन्दिरको भवनको मर्मत सम्भार र जीर्णोद्धार हुने भएको छ ।

लुम्बिनी विकास कोषका उपाध्यक्ष डा.ल्यारक्याल लामा (खेन्पो छिमे छिरिङ)ले मायादेवीको मुख्य मन्दिरको मर्मत सम्भार गर्न लागिएको बताएका छन् ।

उनले भने, ‘मायादेवीको मुख्य मन्दिर जीर्णोद्धार शुरु हुन्छ । रकमको मैले व्यवस्थापन गरेको छु । उपाध्यक्षको जिम्मेवारी सम्हालेकै दिन मायादेवीको मुख्य मन्दिर मर्मत सम्भारका लागि सात करोड दिने घोषणा गरेको थिएँ ।’

डा.लामाले लुम्बिनीलाई नमूनाका रुपमा अगाडि बढाउन चाहेका छन् । उनले लुम्बिनीको गुरुयोजना कति कार्यान्वयन भयो भनेर जानकारी पनि लिइरहेका छन् ।

पूर्वअर्थराज्य मन्त्री समेत रहेका उपाध्यक्ष डा.लामाले मायादेवीको मन्दिर मर्मतसम्भार गर्ने क्रममा सरकारसँग सहयोग नलिने बताए । उनले लुम्बिनीको सबैभन्दा आकर्षण भनेको मायादेवीको मुख्य मन्दिर रहेको बताए ।

उपाध्यक्ष डा.लामा हाल थाइल्याण्डमा छन् । डा.लामा कार्यक्रममा सहभागी हुनुका साथै आफ्नो स्वास्थ्यको उपचार पनि गराएका छन् ।