काठमाडौं । नेपाली कांग्रेसका सभापति शेरबहादुर देउवासँग नेता उप–सभापति धनराज गुरुङ, सह–महामन्त्री जीवन परियार र नेता शेखर कोइरालाले राजनीतिक विषयमा परामर्श गरेका छन् ।

बुधबार धुम्बाराहीस्थित सभापति देउवाको निवासमा उनीहरूका बीच भेट भएको हो । देउवा र कोइरालाबीच पार्टीको संगठन सुदृढीकरण लगायतका विषयमा कुराकानी भएको छ ।

नियमित केन्द्रीय कार्यसमितिको बैठकअघि पार्टी र राष्ट्रिय राजनीतिमा पार्टीले गरेका निर्णय र समसामयिक राजनीतिक विषयमा सभापति देउवाको ध्यानाकर्षण गराउन नेता कोइराला आफूनिकट पदाधिकारीहरूसहित धुम्बाराही पुगेका थिए ।

उप–सभापति एवं कानूनमन्त्री गुरुङ र सह–महामन्त्री परियार पनि देउवा र कोइरालाबीचको भेटवार्तामा सहभागी थिए ।

सभापति देउवाले बिहीबारदेखि केन्द्रीय कार्यसमितिको बैठक बोलाएका छन् ।

बैठकअघि नेता कोइरालाले बैठकका अजेन्डाबारे मंगलबार आफूनिकट नेताहरूसँग छलफल गरेका थिए ।