काठमाडौं । नेपाली कांग्रेस लुम्बिनीका सभापति अमरसिंह पुनले आफूलाई पराजित गर्ने स्वतन्त्र सांसदलाई मन्त्री नबनाउन माग गरेका छन् ।

नेपाली कांग्रेसको केन्द्रीय कार्यसमितिको सानेपामा बुधबार बसेको बैठकमा बोल्दै सभापति पुनले स्वतन्त्र सांसद दीपेन्द्र पुनलाई मन्त्री नबनाउन माग गरे । उनले आफू रोल्पाको प्रदेश सभा क्षेत्र नं. १ बाट गठबन्धनबाट उम्मेदवार बनेर पराजित भएको बताए ।

माओवादीबाट विद्रोह गरेर स्वतन्त्रबाट प्रदेश सांसद जितेका दीपेन्द्र पुनलाई माओवादी केन्द्रले लुम्बिनी प्रदेशको मन्त्री बनाउन लागेको भन्दै आक्रोश पोखे । उनले दीपेन्द्र पुनले स्वतन्त्रबाट जिते पनि अहिले आएर माओवादीमा प्रवेश गरेर मन्त्री बन्न लागेको गुनासो गरे ।

रोल्पाको प्रदेश सभा क्षेत्र नं. १ मा स्वतन्त्र उम्मेदवार दीपेन्द्रकुमार पुन निर्वाचित भएका थिए । दीपेन्द्रले नेपाली कांग्रेसका लुम्बिनी प्रदेशका सभापति अमरसिंह पुनलाई पराजित गरेका थिए ।

माओवादी केन्द्रले टिकट नदिएपछि बागी उम्मेदवार बनेका दीपेन्द्रले १४ हजार ९२७ मत ल्याए । कांग्रेसका अमरसिंह पुनले १० हजार ४०६ मत प्राप्त गरेका थिए ।

माओवादी सशस्त्र द्वन्द्वमा सुरुदेखि नै आवद्ध भएका दीपेन्द्र घाइते समेत हुन् । सत्ता गठबन्धनको सिट बाँडफाँटमा रोल्पा प्रदेशसभा १ नेपाली कांग्रेसलाई दिएपछि दीपेन्द्रले माओवादी केन्द्रको पोलिटब्युरो सदस्य तथा रोल्पा जिल्ला ईन्चार्जबाट राजीनामा दिएर स्वतन्त्र उम्मेदवारी दिएका थिए ।

लुम्बिनी कांग्रेसका सभापति पुनले लेबीको पैसा उठाउन पाउनुपर्ने बताएका छन् । उनले क्रियाशील सदस्यताको पैसा आफूले अहिलेसम्म नपाएको भनेर गुनासो गरेका छन् ।

आर्थिक मामिलामा निकै कमजोर मानिने सभापति पुनले लुम्बिनीमा पार्टी चलाउन निकै समस्या भएको गुनासो गरेका छन् । उनले लेबी उठाउन पार्टी नेतृत्वले स्पष्ट निर्देशन दिनुपर्ने बताएका छन् ।