काठमाडौं । काठमाडौं महानगरपालिकाका नगरप्रमुख बालेन्द्र शाह ‘बालेन’ले भारतीय विवादित फिल्म ‘आदिपुरुष’लाई लिएर अदालतले दिएको आदेशलाई नमान्ने बताएका छन् ।

बिहीबार नगरप्रमुख बालेनले प्रेस नोट जारी गरेर आदिपुरुष फिल्मका कथा लेखकले दिएको विवादित बयानलाई लिएर आक्रोश पोखेका छन् । बालेनले आदिपुरुष फिल्मलाई काठमाडौं महानगरपालिकाभित्र चल्न नदिने बरु जुनसुकै सजाय भोग्न तयार रहेको बताएका छन् ।

बालेनले भनेका छन्, ‘जहाँ सवाल देशको सार्वभौमिकता र स्वाधीनताको आउँछ म कुनै कानून र अदालतलाई मान्नेवाला छैन ।’

‘फिल्म लेखकले नेपाललाई भारतको अधिनमा थियो भनी सकेपछि उनीहरूको नियत थाहा हुन्छ’, बालेनले भनेका छन् ।

‘यो कुरालाई नेपाल सरकारले स्टन्ट भन्नु र अदालतले फिल्म चल्न दिनु भनेको नेपाललाई भारतको अधिनमा थियो, अदालत र सरकार भारतको गुलाम भएको बुझिन्छ’, नगरप्रमुख बालेनले भनेका छन् ।

‘यसको लागि जुनसुकै सजाय भोग्न तयार छु’, बालेनले भनेका छन्, ‘तर फिल्म चल्दैन र चल्न दिइनेछैन ।’

आदिपुरुष फिल्मलाई लिएर बालेनको पछिल्लो अडानले झन् समस्या बनाइदिएको छ ।