काठमाडौं । संखुवासभाको हेवा खोलामा आएको बाढीले बगाउँदा बेपत्ता हुनेको संख्या २१ पुगेको छ ।

शनिबार राति आएको बाढीले बगाउँदा पाँचखपन–९ का सन्तोष राईको मृत्यु भएको प्रहरीले जनाएको छ । बाढीले चैनपुर– ४ मा निर्माणाधीन सुपर होवा हाइड्रोपावरका १८ जना सम्पर्कबाहिर छन् ।

डीएसपी वीरेन्द्र गोदारका अनुसार सभापोखरीमा २ र नुनढाकीमा १ जना बेपत्ता भएका छन् ।

आइतबार बिहान सुपर होवा हाइड्रोपावरका २ जना प्रहरीको सम्पर्कमा आएका छन् ।

चैनपुर नगरपालिका ४ र पाँचखपन नगरपालिका–९ मा गएको पहिरोले खोला थुनिएपछि आएको बाढीले बगाउँदा ठूलो जनधनको क्षति भएको हो ।

हेवा खोलाबाट भएको क्षतिका बारेमा पूर्ण विवरण आएको छैन । सुरक्षाकर्मीले खोजी तथा उद्धारको कार्य जारी राखेका छन् ।

बाढी तथा पहिरोको कारण सडक अवरोध तथा विभिन्न धनमाल नष्ट

संखुवासभा, चैनपुर नगरपालिकास्थित हेवाँ खोला र पिलुवा खोलामा गएराति आएको अविरल वर्षाको कारण आएको बाढीले खोलाको छेउमा रहेका केही घरहरूमा क्षति पुर्‍याएको छ । सोही नगरपालिका-४ दोभानेस्थित निर्माणाधिन सुपरहेवा खोला हाईड्रो पावर र सोही हाईड्रो पावरमा काम गर्ने मजदुर बस्नको लागि बनाईएको क्याम्पमा समेत क्षति पुर्‍याएको छ ।

साथै बाढीको कारणले घाइते भएका चैनपुर नगरपालिका-७ घर भएका सोही हाईड्रोमा काम गर्ने २५ वर्षीय राजेश श्रेष्ठ सहित ३ जना घाइतेको चैनपुर हेल्पिङ हेण्ड अस्पतालमा उपचार भइरहेको छ ।

साथै उक्त बाढीको कारण उक्त हाइड्रोमा काम गर्ने १६ जना कामदार सम्पर्कमा नरहेको भन्ने जनाकारी प्राप्त हुनासाथ ईलाका प्रहरी कार्यालय चैनपुर र सशस्त्र प्रहरी बल चैनपुरबाट खटिएको संयुक्त प्रहरी टोलीले उद्दार तथा खोजी कार्य गरिरहेको छ । उक्त बाढीले पाँचखपन नगरपालिका-५ टुडीखेल वेशी र चैनपुर नगरपालिका-६ भन्ज्याङ खर्क वेशी जोडने हेवा खोलास्थित मोटरेवल पक्की पुलसमेत पूर्णरूपमा क्षति भएको छ ।

पाँचखपन नगरपालिका-५ स्थित हेवा खोला किनारामा हाल नाम, थर, वतन नखुलेका करिब ३० वर्षीय पुरुष शव समेत फेला परेको छ । साथै उक्त खोलामा आएको बाढीले पाँचखपन नगरपालिका-७ एक्ले वेशी र चैनपुर नगरपालिका-६ जोड्ने हेवा खोलामा रहेको झोलुङ्गे पुल र पाँचखपन नगरपालिका-५ सातपत्रे वेशी र चैनपुर नगरपालिका-८ जोड्ने हेवा खोलामा रहेको झोलुङ्गे पुलसमेत पूर्णरुपमा क्षति भएको छ ।

पाँचथर, फिदिम नगरपालिका-४ र हिलिहाङ गाउँपालिका-७ को सिमानामा पर्ने हेवाखोमा अविरल बर्षाको कारण सोमबार बिहान आएको बाढीले सोही खोलामा रहेको हाईवे मेची राजमार्गको पुल पूर्णरुपमा बगाई क्षति भएको छ । फिदिम नगरपालिका-३ कान्छिदोकानस्थित मेची राजमार्गमा माथिबाट माटो सहितको लेदो आई राजमार्ग पूर्णरूपमा अवरोध भएको छ ।

सोही खोलाको बाढीको कारण फिदिम नगरपालिका-४ माझिटारस्थित तमोर करिडोर सकखण्डमा फिदिम नगरपालिका-४ र हिलिहाङ गाउँपालिका-७ जोड्ने बेलिब्रिज समेत बगाई सडकखण्ड पूर्ण रूपमा अवरोध भएको छ । साथै उक्त बाढीले फिदिम नगरपालिका-४ बस्ने रेमश कटुवालको घर र मतानसेमत बगाएको छ ।

साथै बाढीको कारण हिलिहाङ गाउँपालिका र फिदिम नगरपालिका बस्ने ५ जना सम्पर्क विहीन भएको खबर प्राप्त हुनासाथ जिल्ला प्रहरी कार्यालय पाँचथरबाट खटिएको प्रहरीले उद्दार तथा खोजी कार्य गरिरहेको छ । पहिरो गएको स्थानमा नजिकको प्रहरी कार्यालयबाट खटिएको प्रहरी र सशस्त्र प्रहरीले आवश्यक उद्दार कार्य गरिरहेको छ ।