काठमाडौं । सशस्त्र प्रहरी बल नेपालका प्रहरी निरीक्षक नवलप्रभात राईले ड्युटीमा खटिएका प्रहरीमाथि कुटपिट गरेका छन् ।

सशस्त्र प्रहरी बल नम्बर १ बराह बाहिनीबाट निरीक्षणका लागि सादा पोसाकमा खटिएका सशस्त्र प्रहरी निरीक्षक राईले ड्युटी राम्रोसँग नगरेको भन्दै कुटपिट गरेका हुन् ।

मंगलबार राति राईले झापाको मेचीनगरस्थित नेपाल–भारत सीमा नकलबन्दामा ड्युटीमा खटिएका सशस्त्र प्रहरी वरिष्ठ हवल्दार पासाङ तामाङ, सशस्त्र प्रहरी हवल्दार रामबहादुर कार्की, गणेश तामाङ र सहायक हवल्दार शान्तबहादुर राई र जवान उमेश राजवंशीलाई घाइते हुने गरेर कुटेका हुन् ।

राईले उनीहरूलाई मेची नदीको पानीमा चोबल्दै भाटाले हानेका थिए । उनीहरूलाई मंगलबार राति ८ बजे सीमाबाट गोरु छाडेको भन्दै कुटपिट गरेका थिए।

पोसाकमा रहेका प्रहरीलाई सादा पोसाकमा रहेका प्रहरी निरीक्षक राईसहितको टोलीले कुटपिट गरेपछि स्थानीय आक्रोशित भएका थिए ।

राति केही समय नकलबन्दा तनावग्रस्त भएको थियो । स्थानीयले सशस्त्र प्रहरी बल नकलबन्दा बिओपीको गाडी पनि तोडफोड गरेका छन् ।

सशस्त्र प्रहरी बल २ नम्बर गणका प्रमुख सशस्त्र प्रहरी उपरीक्षक देवराज अर्याल पुगेर ड्युटीमा रहेका प्रहरीलाई कुट्नेमाथि कारबाही गर्ने प्रतिबद्धता जनाएपछि स्थानीय शान्त भएका छन् ।

कुटपिटमा संलग्न प्रहरी निरीक्षक राईसहितको टोलीलाई सशस्त्र प्रहरी बल २ नम्बर गण भद्रपुरमा राखिएको छ ।

घटनाको छानबिन गर्ने सशस्त्र प्रहरी बल नम्बर १ बराह बाहिनीका सशस्त्र प्रहरी उपरीक्षक विक्रम हुमागाईंको संयोजकत्वमा छानबिन समिति बनेको छ ।