काठमाडौं । नेपाली कांग्रेसका केन्द्रीय सदस्य तथा प्रतिनिधि सभाका सांसद विनोद चौधरीले प्रधानमन्त्री पुष्पकमल दाहाल ‘प्रचण्ड’को भारत भ्रमणका नवलपरासीको समस्या कुटनैतिक रुपमा उठाउन सुझाव दिएका छन् ।

मंगलबार बसेको प्रतिनिधि सभाको बैठकमा शून्य समयमा बोल्दै सांसद चौधरीले नवलपरासीको सुस्तामा रहेको गण्डक नहरको विषयलाई नेपाल–भारतबीच कुटनैतिक वार्तामार्फत समाधान गर्न आग्रह गरेका हुन् । भारत भ्रमणमा प्रधानमन्त्रीले नवलपरासीको सुस्तामा रहेको गण्डक नहरको विषय उठाउनुपर्ने उनले बताएका छन् ।

सांसद चौधरी नवलपरासी क्षेत्र नं. १ बाट प्रतिनिधि सभामा निर्वाचित भएका हुन् । स्थानीय जनताको मागलाई सरकारसमक्ष उठाउनु उनको दायित्व हो ।

सांसद चौधरीले सुस्तामा नेपाल र भारतको सीमा क्षेत्रमा रहेको गण्डक नहरको संरचना ५०औं वर्ष पुरानो भएको र ती संरचना पुनर्निर्माण नहुँदा हजारौं परिवार र हजारौं विघा खेत डुवानमा परेको बताएका छन् ।

‘भारत र नेपालका बीचमा ५० वर्ष पुराना जीर्ण भएका संरचनाहरू पुनर्निर्माण गर्ने बारेमा कुनै दुविधा छैन, एग्रिमेन्टहरू पटक पटक तयार पारिन्छन्’, सांसद चौधरीले भनेका छन् ।

उनले भने, ‘प्रधानमन्त्रीको भारत भ्रमणका क्रममा यो अत्यन्तै महत्वपूर्ण एजेण्डाको रुपमा प्रवेश गरोस् र ५० वर्षदेखि थुप्रेर बसेका समस्या समाधानको स्पष्ट खाका बाहिर आओस् ।’

कांग्रेसका सांसद चौधरीले सुस्ताको मात्र नभई कोशीको समस्या पनि समाधान गर्नुपर्ने बताएका छन् ।

सांसद चौधरी कुटनैतिक क्षेत्रका जानकार पनि हुन् । नेपाल र भारतबीचको व्यापारलाई झन् सहज रुपमा अगाडि बढाएर दुबै मुलुकलाई फाइदा हुने गरेर काम गर्नुपर्ने उनले बेलाबेला सुझाव दिने गरेका छन् ।