काठमाडौं । नेपाल उद्योग वाणिज्य महासंघको वरिष्ठ उपाध्यमा अञ्जन श्रेष्ठ सर्वसम्मत निर्वाचित भएका छन् ।

दोस्रो चरणमा गएको वरिष्ठ उपाध्यक्षको प्रतिस्पर्धामा उमेशलाल श्रेष्ठले अञ्जनलाई समर्थन गरेपछि सर्वसम्मत भएको हो । वरिष्ठ उपाध्यक्षमा निर्वाचित भएका अञ्जन प्रजातान्त्रिक समूहका हुन् । उमेशलाल प्रगतिशील समूह निकटका हुन् ।

प्रजातान्त्रिक समूहलाई सहयोग गर्न नेपाली कांग्रेसले केन्द्रीय सदस्य तथा पूर्वमन्त्री मोहनबहादुर बस्नेतलाई खटाएको थियो ।

सभापति शेरबहादुर देउवाको निर्देशनमा नेता बस्नेतले महासंघको वरिष्ठ उपाध्यक्ष अञ्जन र अन्य पदाधिकारी तथा सदस्यहरूलाई विजयी बनाउन विशेष भूमिका खेलेका थिए । नेता बस्नेतले कमलादीस्थित रोयलसिंघे होटलमा भएको विशेष कार्यक्रममा वरिष्ठ उपाध्यक्ष अञ्जनसहितका पदाधिकारीलाई फूलमालासहित बधाइ दिएका छन् । आगामी कार्यकालको शुभकामना दिँदै कांग्रेस नेता बस्नेतले भने, ‘मुलुकको अर्थतन्त्र असहज भइरहेको छ । यो अर्थतन्त्रलाई सुधार गर्न विशेष भूमिका र नेतृत्वदायी काम गर्नुहोला ।’

महासंघको वरिष्ठ उपाध्यक्ष अर्को कार्यकालमा स्वत: अध्यक्ष हुने प्रावधान विधानमा छ । अर्को कार्यकालमा वरिष्ठ उपाध्यक्ष अञ्जन महासंघको स्वत: अध्यक्ष हुनेछन् ।

नेता बस्नेतका साथै पूर्व अध्यक्ष भवानी राणा, वरिष्ठ उपाध्यक्षसहितको पहलमा अञ्जनको पक्षमा सहमति बनाएको छ । दोस्रो चरणको निर्वाचन भएको भएपनि अञ्जनले जित्ने पक्का जस्तै थियो । अञ्जनले जित्ने र आफू पराजित हुने भएपछि उमेशलाल सहमतिमा आउन बाध्य भएका हुन् । प्रजातान्त्रिक समूहले महासंघमा वरिष्ठ उपाध्यक्षसहित पदाधिकारी र सदस्यहरूमा बहुमत पदमा जितेको छ । प्रगतिशील समूह महासंघमा अल्पमतमा छ । महासंघको स्वत: अध्यक्ष बनेका चन्द्र ढकाल कम्युनिस्ट हुन् । उनी एमाले निकट मानिन्छन् ।

यसअघि वस्तुगत, जिल्ला, नगर र एसोसिएट उपाध्यक्ष निर्वाचित भइसकेका छन् । महासंघको कोषाध्यक्ष नियुक्त भने नयाँ नेतृत्वको छलफलका आधारमा हुनेछ । वरिष्ठ उपाध्यक्षका निर्वाचको पहिलो चरणबाट रामचन्द्र संघई झिनोमतले बाहिरिएका थिए ।

कांग्रेसका सभापति शेरबहादुर देउवासँग बिहान कुरा गरेर अञ्जनले माहोल आफ्नो पक्षमा पारिसकेका थिए । देउवाले नेता बस्नेतलाई मैदानमै खटाएपछि प्रगतिशील समूहका उमेशलाल पराजित हुने पक्का थियो ।

जातीय रुपमा बाहिर बसिरहेको मारवाडी समूदायले समेत अञ्जनलाई सहयोग गर्ने निर्णय गरेको थियो । यसैबीच, अध्यक्ष शेखर गोल्छाले वरिष्ठ उपाध्यक्ष ढकाललाई पद तथा गोपनीयाको सपथ ग्रहण गराएका छन् ।

यी हुन् एशोसिएट, जिल्ला, नगर र वस्तुगततर्फ विजयी सदस्यहरू