काठमाडौं । नेपाली कांग्रेसका वरिष्ठ नेता समेत रहेका राष्ट्रपति पदका उमेदवार रामचन्द्र पौडेलले आफू राष्ट्रपतिमा निर्वाचित हुनेमा ढुक्क रहेको बताएका छन् ।

बिहीबार बिहान निर्वाचनस्थल संसद् भवन नयाँ बानेश्वरमा पत्रकारहरूसँग कुरा गर्दै पौडेलले सबै सांसदहरूको आफूलाई शुभेच्छा रहेको बताएका छन् ।

पौडेलले आफूलाई एमालेका सांसदहरूले पनि मत दिने विश्वास व्यक्त गरेका छन् । उनले आफूलाई राष्ट्रिय सहमतिको राष्ट्रपति बन्न सबैले सघाउने विश्वास व्यक्त गरेका छन् ।

उनले आफू संविधानको रक्षक भएर काम गर्ने प्रतिवद्धता जनाएका छन् । पौडेलले भने, ‘संविधानको संरक्षक भएर भूमिका खेल्नेछु ।

‘राजतन्त्रको राष्ट्राध्यक्ष र गणतन्त्रको राष्ट्राध्यक्षमा फरक पाउनुहुनेछ’, उनले भने, ‘म सहमतिकै उमेदवार हुँ, भोट क्रस हुँदैन ।’

बिहीबार बिहान १० बजेदेखि ३ बजेसम्म राष्ट्रपतिको निर्वाचन हुँदैछ । मतदान गर्न सांसदहरू संसद भवन नयाँ बानेश्वरमा जम्मा भएका छन् ।