काठमाडौं । एमाले र माओवादी केन्द्रको कम्युनिस्ट गठबन्धन भत्किने संघारमा रहेका बेला नेपालका लागि चिनियाँ राजदूत चेन संगले एमालेका अध्यक्ष खड्गप्रसाद ओलीसँग भेटवार्ता गरेका छन् ।

शुक्रबार भक्तपुरको बालकोटस्थित निवासमा चेनले ओलीसँग भेट गरेका हुन् । भेटमा नेपाल र चीनको सम्बन्ध तथा नेपालका राजनीतिक अवस्थाका बारेमा छलफल भएको बुझिएको छ ।

ओलीलाई राजदूत चेनले माओवादीसँगको गठबन्धन बचाउन सुझाव दिएको एमालेका एक नेताले बताएका छन् ।
चीनले एमाले र माओवादीलाई मिलेर सरकार चलाउन दवाव दिएको चर्चा छ ।

ओलीसँग शुक्रबार नै प्रधानमन्त्री समेत रहेका माओवादी केन्द्रका अध्यक्ष पुष्पकमल दाहाल ‘प्रचण्ड’ले भेट गरेका थिए । ओली र दाहालबीच भेट भएको केही समयपछि ओलीलाई चिनियाँ राजदूत चेनले भेट गरेका हुन् ।

नेपालको आन्तरिक राजनीतिलाई चीनले हस्तक्षेप गर्दै आएको छ । चीनको पछिल्ला गतिविधिहरू निकै आलोचित छन् ।

नेपालसँगको उत्तरी नाकाहरू बन्द गरिदिएर नेपालमाथि अघोषित नाकाबन्द लगाउँदै आएको चीनले राजनीतिक दवाव बढाउँदै लगेको छ ।

तातोपानी नाका खोल्न चीनले मानेको छैन । रसुवाको नाका पनि चीनले केही दिन खोलेर बन्द गरिदिएको छ ।

चीनले नेपाललाई मिटर व्याजमा ऋण दिएर हैरान बनाएको छ । चीनको मिटर व्याजको ऋणका कारण कुनै पनि बेला नेपाललाई समस्या पर्न सक्छ ।