काठमाडौं । काठमाडौं उपत्यका अपराध अनुसन्धान कार्यालयले ९० वर्षीया वृद्धाको हत्या गरेको अभियोगमा ३९ वर्षीय नरेन्द्र शिवभक्तीलाई पक्राउ गरेको छ ।

बिहीबार नरेन्द्रलाई प्रहरीले तारकेश्वर नगरपालिका ६ पुशलबाट पक्राउ गरेको विज्ञप्तिमार्फत जनाएको छ ।

काठमाडौंको तारकेश्वर नगरपालिका ६ पुशलबाट हराइरहेकी ९० वर्षीया डिल्ली पुतुवारको मंसिर २२ गते बिहान साढे ८ बजे तारकेश्वर नगरपालिका ३ पारीवनपाखा समुदायिक बनको खोल्सामा शव भेटिएको थियो ।

पुतुवारको शवको टाउको तथा मुखमा चोट लागेको अवस्थामा शव भेटिएको प्रहरीले जनाएको छ ।

पुतुवारको हत्याको घटनामा अनुसन्धान गर्ने क्रममा प्रहरीले छिमेकी नरेन्द्रलाई जंगलमा लगेर हत्या गरेको खुलेको छ ।

पुतुवारको साथमा रहेको ४५/५० हजार लुट्नका लागि ढुंगाले हानेर हत्या गरी शवलाई खोल्सामा फालेर नरेन्द्र भागेका थिए ।

वृद्धा पुतुवारसँग रहेको पैसा पनि नरेन्द्र लगेका छन् ।