काठमाडौं । माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्ना ‘दूत’लाई पठाएर एमालेका अध्यक्ष खड्गप्रसाद ओलीसँग वार्ता गरेका छन् ।

मंगलबार राति माओवादीका महासचिव देवप्रसाद गुरुङले अध्यक्ष ओलीलाई बालकोटस्थित निवासमा पुगेर भेट गरेका हुन् । गुरुङले ओलीलाई प्रचण्डले पठाएको सन्देश सुनाएको स्रोतले जनाएको छ ।

ओलीसँग प्रचण्डले एमाले र माओवादी वाम गठबन्धनको सरकार बनाउनेबारेमा कुराकानी भएको बुझिएको छ । एमाले र माओवादीका दोस्रो तहका नेताहरू पनि ठूलो पार्टी कांग्रेसलाई बाहिर राखेर कम्युनिस्टहरू सरकार बनाउनुपर्ने भनेर छलफलहरू गरिरहेका बेला महासचिव गुरुङले ओलीलाई भेटेपछि हँगामा भएको छ ।

निर्वाचन आयोगले प्रतिनिधि सभा र प्रदेश सभाको चुनावी नतिजाको अन्तिम प्रतिवेदन बुझाउने तयारी भइरहेका बेला दुई ठूला कम्युनिस्ट पार्टीका नेताहरूबीचको संवाद पनि बाक्लो हुन थालेको छ ।

एमाले र माओवादीसहित वामपन्थी शक्तिहरू मिलेर सरकार बनाउने विषयमा नै उनीहरूबीच छलफल भएको बताइएको छ ।

एमाले अध्यक्ष ओलीसँगको भेटघाटबारे माओवादी केन्दका महासचिव गुरुङले विस्तृतमा बताउन चाहेनन् ।

एमालेका उपाध्यक्ष सुवास नेम्वाङ र विष्णु पौडेल, महेश बस्नेतसहितका नेताहरू एमाले र माओवादी मिलेर सरकार बनाउनुपर्ने प्रयासमा छन् ।

उनीहरू निरन्तर माओवादीका नेताहरूसँग संवादमा छन् । माओवादी केन्द्रका उप–महासचिव जनार्दन शर्मा पनि एमालेसँग मिलेर सरकार बनाउनुपर्ने पक्षमा छन् । उप–महासचिव शर्मा र एमालेका उपाध्यक्ष पौडेलले बाक्लै भेटघाट गर्ने गरेका छन् ।

वामपन्थीहरूको सरकार बनाउन दोस्रो तहका नेताहरू एमाले अध्यक्ष ओली र माओवादी केन्द्रका अध्यक्ष प्रचण्डबीच भेटघाट गराउने प्रयासमा रहेका छन् ।

ओलीले माधव नेपाललाई साथमा हिँडाउन चाहेका छैनन् । प्रचण्डले माधवलाई छाड्न चाहेका छैनन् । सोही कारण समस्या भएको छ । तर, माधवलाई पनि साथमा लिएर ओली र प्रचण्डले योजना बनाइरहेको बुझिएको छ ।