काठमाडौं । एमालेका महासचिव शंकर पोखरेल प्रतिनिधि सभामा पराजित भएका छन् ।

प्रतिनिधि सभा र प्रदेश सभा निर्वाचनमा पोखरेलको गृहजिल्ला दाङमा एमालेको बीउ नै नास भएको छ । तीन वटा प्रतिनिधि सभा र ६ वटा प्रदेश सभामा एमालेले एउटा पनि सिट जित्न सकेन ।

महासचिव पोखरेलको गलत नीति र व्यक्तिवादी चरित्रका कारण एमालेले दाङमा धुलोचाट्न बाध्य भएको छ ।

२०७४ को चुनावमा माओवादी केन्द्रको बुइ चेढेर एमालेले दाङको क्षेत्र नं. १ र ३ मा जितेको थियो । प्रदेश सभा ४ वटा जितेको थियो ।

यस पटकको चुनावमा एमालेको पत्तासाफ भएको छ । एमालेको पत्तासाफ भए पनि महासचिव पोखरेलले आफ्नी बहिनी मेनकाकुमार पोखरेललाई समानुपातिकबाट प्रतिनिधि सभाको सांसद बनाएका छन् ।

आफै पनि पराजित भएका र आफ्नै गृहजिल्ला दाङमा एमालेको बीउ बचाउन नसकेका पोखरेलले महासचिव पदबाट राजीनामा दिने कि नदिने ? प्रश्न उठेको छ । एमालेभित्र पोखरेलको राजीनामाको जबरस्त आवाज उठ्न थालेको छ ।

नेतृत्व सम्हाल्न नसक्ने पोखरेललाई महासचिव पद घाँडो भएको छ । पोखरेल बौद्धिक नेता हुन् । तर, उनले पार्टीमा गतिलो संगठन गर्न सक्दैनन् भन्ने कुरा यस पटकको प्रतिनिधि सभा र प्रदेश सभाको चुनावको परिणामले देखाएको छ ।

विगतका एमालेका महासचिवहरू पराजित भएका थिएनन् । जस्तो परिस्थिति हुँदा पनि जितेका थिए । त्यसको जल्दोबल्दो उदाहरण विष्णु पौडेल छन् ।

महासचिव पोखरेलले पदबाट राजीनामा दिएर सक्षम नेतालाई संगठन गर्ने बाटो छाडिदिनुपर्ने माग उठेको छ ।

शनिबार ललितपुरमा बसेको एमालेको सचिवालयको बैठकमा महासचिव पोखरेलको भूमिका र गतिविधिलाई लिएर नेताहरूले आलोचना गरेका छन् । एमालेका एकजना पदाधिकारीका अनुसार आफू पनि जित्न नसक्ने र आफ्नै गृहजिल्लामा एउटा सिट पनि जिताउन नसकेको भनेर पदाधिकारीहरूले पोखरेलको आलोचना गरेका थिए ।

पोखरेललाई महासचिव पदबाट राजीनामा दिएर बाटो छाड्न सुझाव आएको ती नेताको भनाइ छ ।

पोखरेलले दाङमा आफ्नो शक्तिको दुरुपयोग गरेर पूर्वमण्डलेहरूलाई टिकट दिएको आरोप छ । बद्नाम ठेकेदारहरूलाई पोखरेलले बोकेका थिए ।

पार्टीभित्रका सक्षम नेताहरू हुँदाहुँदै गलत व्यक्तिलाई टिकट दिनु पोखरेलको ठूलो गल्ती रहेको दाङका एमाले नेताहरूले बताउने गरेका छन् ।

नेपाली कांग्रेस, माओवादी केन्द्र, एकीकृत समाजवादी, राष्ट्रिय जनमोर्चासहितका दलहरूको गठबन्धनको दब्दबा रहेका बेला महासचिव पोखरेलले शान्ता चौधरीलाई क्षेत्र नं. १ को टिकट दिएर शहीद बनाएका छन् । शान्तालाई दाङ २ बाट टिकट दिनुपर्ने थियो । शान्तालाई २ बाट टिकट दिएको भए उनले जित्ने सम्भावना निकै थियो ।

दाङ १ बाट गंगा चौधरीलाई टिकट दिनुपर्ने थियो । व्यक्तिगत ईगोका कारण महासचिव पोखरेलले गंगालाई टिकट दिएनन् ।

दाङ क्षेत्र नं. ३ बाट पोखरेलले उम्मेदवारी दिनुपर्ने थियो । पोखरेल नेपाली कांग्रेसका केन्द्रीय सदस्य दीपक गिरीसँग पराजित हुने डरले क्षेत्र नं. २ मा उम्मेदवार बनेका थिए । तैपनि पोखरेल पराजित भएका छन् ।

पोखरेललाई माओवादी केन्द्रकी नेतृ रेखा शर्माले पराजित गरेर सबक सिकाएकी छिन् । माओवादी नेतृ शर्मालाई हराउँछु भनेर पोखरेलले चुनावी प्रचारका क्रममा अहँकारपूर्ण अभिव्यक्ति दिने गरेका थिए । दाङ २ का मतदाताले पोखरेललाई हराएर राम्रो पाठ सिकाएका छन् ।

पोखरेलले आफ्नै बलबुताले दाङबाट जितेको अहिलेसम्म तथ्याङ्क छैन । यस पटक पराजित भएपछि पोखरेलको झन् खाराब अवस्था भएको छ । दाङका मतदातालाई पोखरेलको हैसियत राम्रोसँग जानकारी राखेका छन् ।