काठमाडौं । नेपाली कांग्रेसका केन्द्रीय सदस्य एवम् प्रतिनिधि सभाका नवनिर्वाचित सांसद रामहरि खतिवडाले ओखलढुंगाको योजना र विकासका विषयमा कार्यालय प्रमुखहरूसँग छलफल गर्न लागेका छन् ।

खतिवडाले मंसिर २१ गते बुधबार बिहान ११ बजे जिल्ला प्रशासन कार्यालय ओखलढुंगामा छलफल राखेको खतिवडाका स्कीय सचिव हुकुम राईले बताए ।

ओखलढुंगाको समग्र विकासको लागि चुनावी प्रतिवद्धताअनुसार जिल्लामा अहिलेसम्म भएका सम्पूर्ण योजनाहरूको प्रगति विवरण र कार्ययोजनाका लागि सम्पूर्ण डिभिजन बप्रमुखहरूसँगको छलफल राखिएको छ ।

कांग्रेस नेता खतिवडाले जनताले आफूसँग विकासको ठूलो अपेक्षा राखेको भन्दै ५ वर्षसम्म आफू दिनरात नभनेर काममा लाग्ने जनाउँदै आएका छन् ।

यसअघि, सोमबार नेता खतिवडाले नेपाल बिद्युत प्राधिकरणका प्रमुख कार्यकारी निर्देशक कुलमान घिसिङसँग भेट गरेर ओखलढुंगाका ७५ वटै वडाका गाउँहरूमा बिजुली पुर्‍याउन आग्रह गरिसकेका छन् । घिसिङले पनि खतिवडाको मागको सुनुवाई हुने बताएका छन् ।