काठमाडौं । काठमाडौं १ मा नेपाली कांग्रेसका नेता प्रकाशमान सिंहले चौथो पटक जित हासिल गरेर ईतिहाँस बनाएका छन् ।

मंगलबार बिहान काठमाडौं १ का मतदाताले सिंहलाई प्रतिनिधिसभा सदस्यमा निर्वाचित गराएका छन् ।

कांग्रेस नेता सिंहलाई हराउन व्यक्तिगत दुश्मनी सरह विपक्षी दल र स्वतन्त्रहरू लागेका थिए । तर, मतदाताले सिंहलाई सांसदमा जिताइदिएका छन् ।

सिंहले राप्रपाका उम्मेदवार रविन्द्र मिश्रलाई १२५ मतान्तरले पराजित गरेका छन् ।

सिंहले ७ हजार १४३ मत ल्याएका थिएर विजयी भएका हुन् । निकटतम प्रतिद्वन्द्वी मिश्रले ७ हजार १८ मत पाएका छन् ।

यसअघि २०७४को चुनावमा पनि सिंहले मिश्रलाई नै पराजित गरेर चुनाव जितेका थिए ।

राष्ट्रिय स्वतन्त्र पार्टीका पुकार बमले ४ हजार ११५, एमालेका किरण पौडेलले ३ हजार ५३२ मत र सुशासन पार्टीका रमेश खरेलले ३ हजार १२४ मत पाएका छन् ।

रविन्द्र मिश्रसहितका उम्मेदवारहरू एक ठाउँ नहुँदाको फाइदा सिंहले उठाएका छन् ।

२०४८ मा काठमाडौं–४ मा र २०५१ मा काठमाडौं–३ मा पराजित भएका उनले २०५३ सालमा राष्ट्रिय सभा सदस्य भएर ६ वर्ष बिताएका थिए ।

२०६४ सालमा भएको पहिलो संविधानसभा निर्वाचनमा सिंह काठमाडौं १ मा आएर जितेपछि निरन्तर चौथो विजय हात पारेका छन् ।