काठमाडौं । नेपाली कांग्रेसले मुस्ताङबाट प्रतिनिधि सभा र प्रदेश सभातर्फ शानदार जित निकालेर खाता खोलेको छ ।

कांग्रेसका तीन जना युवाहरूले पूरै जिल्लाका क्लिन स्वीप गरेका छन् ।

प्रतिनिधि सभाको सदस्यतर्फ कांग्रेसका योगेश गौचन थकाली विजयी भएका छन् । थकालीले ३ हजार ९९२ मत पाएर विजयी भएका हुन् ।

प्रतिनिधि सभातर्फ शानदार जित हात पारेका थकाली पूर्वमन्त्री एवम् कांग्रेस नेता रोमी गौचन थाकालीका छोरा हुन् ।

कांग्रेसका युवा नेता थकालीले एमालेका प्रेमप्रसाद तुलाचनलाई ९१४ मतको अन्तरले हराएका छन् । तुलाचनले ३०७८ मत पाएर पराजित भएका छन् ।

राष्ट्रिय स्वतन्त्र पार्टीका सुदेश गुरुङले ८७ मत पाएका थिए । राप्रपाका प्रवीणकुमार शेरचनले १३ मत पाएका छन् ।

मुस्ताङको दुवै प्रदेशसभा सदस्यमा पनि कांग्रेसकै उम्मेदवार विजयी भएका छन् ।

प्रदेश सभा १ मा नम्डु गुरुङ र प्रदेश सभा २ मा विकल शेरचन विजयी भएका छन् ।

गुरूङले एमालेका ईन्द्रधारा विष्टलाई पराजित गरेका छन् । शेरचनले एमालेकै चन्द्रमोहन गौचनलाई पराजित गरेका हुन् ।

गुरुङले १ हजार ४८ मत ल्याएर प्रदेशसभामा निर्वाचित हुँदा विष्टले ७ सय ९३ मत पाएका थिए । विष्ट निवर्तमान प्रदेश सभा सदस्य पनि हुन् ।

शेरचनले २ हजार ७२३ मत ल्याउँदा निकटतम् प्रतिद्वन्द्वी गौचनले २ हजार ५६५ मत पाएका छन् ।