घोराही । दाङमा रोशनी महतरा र शरद आचार्यको हत्या प्रकरणको टुङ्गामा प्रहरी पुगेको छ ।

झण्डै एक महिनापछि रोशनी–शरद हत्याका दोषी र कारण प्रहरीले पत्ता लगाएको दाङ प्रहरी स्रोतले जनाएको छ ।

असोज ३० गते रोशनी–शरदको हत्या भएको अवस्थामा शव गाडिएको स्थानमा भेटिएको थियो ।

प्रहरीले हत्याको घटनालाई सुक्ष्म रुपमा अनुसन्धान गरेर दोषीलाई पक्राउ गरेको छ । पक्राउ परेका दोषीलाई दाङ प्रहरीले आज शनिबार सार्वजनिक गर्ने तयारी गरेको छ ।

स्रोतका अनुसार शिकारीले थापेको विद्युतीय धरापमा परेर रोशनी–शरदको मृत्यु भएको खुलेको छ । शिकारीहरूले बँदेल मार्नका लागि नजिकैको घर–टहराबाट बिजुलीको तार तानेर बिद्युतीय धराप राखेको र सोही धरापमा परेर उनीहरूको मृत्यु भएको प्रहरीको अनुसन्धानबाट खुलेको छ ।

रोशनी र शरदको मृत्यु विद्युतीय धरापबाट नभएको बनाउन ती शिकारीहरूले ढुंगाले हानेका अनुसन्धानका क्रममा खुलेको छ । रोशनी र शरदको हत्या प्रकरण लुकाउन प्रमाण नष्ट गर्ने प्रयास भएको समेत देखिएको छ ।

तुलसीपुर उप–महानगरपालिका–१३ दमारगाउँकी १५ वर्षीया रोशनी र दंगीशरण गाउँपालिका–६ थपगाउँका १४ वर्षीय शरदको शव स्थानीय जंगलमा असोज ३० माटोले पुरिएको अवस्थामा फेला परेका थिए ।

उनीहरु असोज २७ गते राति करिब सवा दश बजेतिर घरबाट निस्किएका थिए । उनीहरू साढे दश बजेपछि सम्पर्कबिहीन थिए ।