लहान । जनता समाजवादी पार्टी, नेपाल (जसपा)का नेता राजकिशोर यादवले सिरहा–२ मा आफ्नो प्रचार–प्रसार शुरु गरेका छन् ।

आइतबार सिरहा–२ मा मनोनयन दर्ता गराएका नेता यादवले आफूलाई गाउँ, टोल, भेला, सभा, विभिन्न औपचारिक र अनौपचारिक कार्यक्रमहरूमा केन्द्रित बनाएका हुन् ।

सिरहा–२ मा मनोनयन दर्ता गराएका यादवलाई एमालेको समर्थन रहेको छ । जसपा र एमालेसहितका दलहरूबीच गठबन्धन बनेको छ ।

२०७४ को निर्वाचनमा नेता यादवल सिरहा–४ बाट निर्वाचित भएका थिए ।

मंसिर ४ गतेको निर्वाचनका लागि जसपाले नेता यादवलाई सिरहा–२ मा टिकट दिएको छ ।

पूर्वमन्त्री समेत रहेका नेता यादवले परिवर्तन, विकास, शिक्षा र स्वास्थ्यका लागि आफूलाई मतदान गर्न अपील गरेका छन् ।

उनले आफूलाई चुनाव चिन्ह छातामा मतदान गर्न र एमालेका प्रदेश सभातर्फका उम्मेदवारलाई पनि मतदान गर्न अनुरोध गरेका छन् ।

यादवलाई जसपाभित्र बौद्धिक नेताका रुपमा पनि लिइन्छ । कठिन समयमा पनि उनले जसपालाई बचाउने भूमिका खेल्दै आएका छन् ।

यसैबीच, सिरहा–२ ‘क’मा जसपाका विजय यादव र ‘ख’ एमालेका शत्रुधनप्रसाद सिंहले मनोनयन दर्ता गराएका छन् ।