घोराही । माओवादी केन्द्रको दाङ जिल्ला कमिटीले रोशनी यौनकाण्डमा मुछिएर सभामुख पद गुमाएका नेता कृष्णबहादुर महरालाई एकल सिफारिस गर्न डराएको छ ।

माओवादीको क्षेत्र नं. २ को नेतृत्वले दाङ क्षेत्र नं. २ बाट महरालाई मात्रै सिफारिस नगरेर तीन जना नेताको नाम सिफारिस गरेको छ ।

प्रतिनिधि सभाको प्रत्यक्षतर्फ माओवादीले महराका साथै नेतृ रेखा शर्मा र नेता निर्मला आचार्यको नाम सिफरिस गरेको छ ।

माओवादी केन्द्रका केन्द्रीय सदस्य हेमराज शर्माले महरासहित शर्मा र आचार्यको नाम पनि प्रतिनिधि सभातर्फ प्रत्यक्षमा सिफारिस गरिएको पत्रकारहरूलाई बताएका छन् ।

प्रतिनिधि सभा निर्वाचन क्षेत्रीय समन्वय समितिका अध्यक्ष भक्तबहादुर वलीको अध्यक्षता एवम् माओवादी केन्द्रका उपाध्यक्ष कृष्णबहादुर महराको प्रमुख आतिथ्यतामा बसेको बैठकले प्रतिनिधिसभामा दाङ निर्वाचन क्षेत्र नं २ बाट तीन जनाको नाम सिफारिस गर्ने निर्णय गरेको हो ।

बैठकपछि माओवादी केन्द्र दाङका सचिव विश्वराज आचार्यले महरालाई मात्रै एकल सिफारिस नगरिएको बताए ।

रोशनी शाही योनकाण्डमा महरा मुछिएपछि उनी बद्नाम भएका छन् । अदालतबाट सफाइ पाए पनि महरा दाङमा अलोकप्रिय छन् ।

महराले आफूले टिकट नपाएमा रेखा शर्मा वा निर्मल आचार्यलाई उम्मेदवार बनाउने पक्षमा देखिएका छन् ।

दाङ क्षेत्र नं. २ मा माओवादी निकै कमजोर छ । माओवादी दाङबाट यस पटक बढारिने पक्का छ ।