काठमाडौं । कोरोना महामारीका बेला ज्वरोको औषधि पारासिटामोल अभाव भएको भनिएका बेला सरकारले देशभरि प्यारासिटामोल औषधि पठाएको छ ।

शुक्रबार स्वास्थ्य तथा जनसंख्या मन्त्रालयले सबै प्रदेशमा १ करोड ३३ लाख ४२ हजार ट्याब्लेट पारासिटामोल पठाएको जानकारी दिएको छ ।

कोरोना भाइरसको संक्रमण बढेपछि पछिल्लो केही दिनयता बजारमा पारासिटामोलको अभाव देखिएको समाचार सम्प्रेषण भएका थिए ।

त्यसपछि प्रधानमन्त्री शेरबहादुर देउवाले गृहमन्त्री बालकृष्ण खाण र मुख्यसचिव शंकरदास बैरागीलाई बोलाएर प्यारासिटामोल औषधिका विषयमा चासो राखेका थिए ।

देउवाले छिटोभन्दा छिटो प्यारासिटामोलको अभाव हुन नदिन निर्देशन दिएका थिए ।

मन्त्रालयले केन्द्रीय मेडिकल स्टोर पथलैयाबाट प्रादेशिक स्टोरहरूमा पारासिटामोल ५०० एमजीका ट्याब्लेट वितरण गरेको छ ।

प्रदेशहरूमा पठाइएको बाहेक अझै सरकारसँग ११ लाख ५८ हजार ट्याब्लेट पारासिटामोल स्टकमा रहेको छ ।

प्रदेश १ को स्वास्थ्य आपूर्ति व्यवस्थापन केन्द्र विराटनगरले २७ लाख ६४ हजार प्यारासिटामोल पाएको छ ।

मधेश प्रदेशको स्वास्थ्य आपूर्ति व्यवस्थापन केन्द्र धनुषाले २१ लाख ३० हजार प्यारासिटामोल पाएको छ ।

बागमती प्रदेशको स्वास्थ्य आपूर्ति व्यवस्थापन केन्द्र हेटौंडाले १० लाख ९८ हजार प्यारासिटामोल पाएको छ ।

गण्डकी प्रदेशको स्वास्थ्य आपूर्ति व्यवस्थापन केन्द्र पोखराले १८ लाख प्यारासिटामोल पाएको छ ।

लुम्बिनी प्रदेशको स्वास्थ्य आपूर्ति व्यवस्थापन केन्द्र बुटवलले २७ लाख ३० हजार प्यारासिटामोल पाएको छ ।

कर्णाली प्रदेशको प्रदेश स्वास्थ्य आपूर्ति व्यवस्थापन केन्द्र नेपालगञ्जले १० लाख २० हजार प्यारासिटामोल पाएको छ ।

सुदूरपश्चिम प्रदेशको स्वास्थ्य आपूर्ति व्यवस्थापन केन्द्र धनगढीले १८ लाख प्यारासिटामोल पाएको छ ।