काठमाडौं । नेपाली कांग्रेसको प्रदेशहरूमा आज (बिहीबार) प्रदेशको प्रथम महाधिवेशन हुँदैछ ।

महाधिवेशनको सबै तयारी भएका छन् । महाधिवेशनलाई नेताहरूले सम्बोधन गर्नेछन् । महाधिवेशन प्रतिनिधिहरू आ–आफ्नो स्थानमा पुगिसकेका छन् ।

कांग्रेस सभापति एवम् प्रधानमन्त्री शेरबहादुर देउवाले बागमती प्रदेश कांग्रेसको महाधिवेशन उद्घाटन गर्नेछन् ।

सभापति देउवा आउने भएपछि बागमती प्रदेशको अधिवेशनको सम्पूर्ण तयारी भइसकेको प्रदेश अधिवेशनका संयोजक प्रदीप कोइरालाले जानकारी दिएका छन् ।

कार्यक्रम हेटौँडामा रहेको वनविज्ञान अध्ययन संस्थानको कम्पाउण्डमा बिहीबार बिहान ११ बजे हुनेछ ।

प्रदेशको संरचनाअनुसार कांग्रेस प्रदेशको निर्वाचन यो पहिलोपटक हुँदैछ ।

प्रदेश सभापतिमा देउवा समूहबाट मकवानपुर जिल्ला सभापति तथा बागमती प्रदेश संसदीय दलका नेता इन्द्रबहादुर बानियाँले उम्मेदवारी घोषणा गरेका छन् ।

कृष्णप्रसाद सिटौला समूहबाट काठमाडौं जिल्लाका पूर्वसभापति तथा पूर्व रक्षामन्त्री भीमसेनदास प्रधानले उम्मेदवारी घोषणा गरेका छन् ।

नेता रामचन्द्र पौडेल समूहले प्रदेश सभापतिमा जगदीश्वरनरसिंह केसीको नाम अगाडि सारेको छ ।

बागमती प्रदेश अधिवेशनमा मंसिर १७ गते मनोनयन दर्ता र १८ गते मतदान हुने निर्वाचन कार्यतालिका छ ।