काठमाडौं । नेपाली कांग्रेसका केन्द्रीय सदस्य एवम् पूर्वमन्त्री मोहनबहादुर बस्नेतले कोरोनाबाट मृत्यु भएकी सिन्धुपाल्चोक जिल्लाकी महिलाको शिशुको शिक्षा र रोजगारीको जिम्मेवारी लिएका छन् ।

कांग्रेस नेता बस्नेतले सोमबार विज्ञप्ति जारी गरेर बाह्रविसे नगरपालिकाको वडा नम्बर ९ राम्चे, ठोट्नेरीकी ती महिलाका शिशुको कक्षा १ देखि १२ कक्षासम्मको शिक्षा आफूले ब्यहोर्ने जनाएका हुन् ।

ती बालकको शिक्षा पूरा भएपछि रोजगारीको व्यवस्था पनि आफूले नै गरिदिने बस्नेतले बताए ।

९ दिनका ती शिशुको स्वास्थ्य सुधार र पौष्टिक आहारका लागि रु. ५० हजार नगद पनि कांग्रेस नेता बस्नेतले उपलब्ध गराएको विज्ञप्तिमार्फत जनाएका छन् ।

राम्चेकी ती महिला कोरोना भाइरसबाट मृत्यु भएकी नेपालको पहिलो महिला हुन् ।

कांग्रेसका नेता बस्नेतले गृहजिल्ला सिन्धुपाल्चोक जिल्लामा लकडाउन भएपछि स्वास्थ्य सामग्री वितरणदेखि समस्यामा परेका मजदुर र अति निम्न परिवारलाई खाद्य सामग्री समेत उपलब्ध गराउँदै आएका छन् ।