काठमाडौं । सत्तारुढ दल नेपाल कम्युनिस्ट पार्टी (नेकपा)का नेताहरूबीच मत बाझिएपछि केन्द्रीय सचिवालय बैठक विना कुनै निस्कर्ष सक्किएको छ ।

प्रधानमन्त्री निवास बालुवाटारमा बुधबार बसेको सचिवालय बैठकमा नेताहरूबीच मत बाझिएपछि जिल्ला कमिटीको इञ्जार्च र सहइञ्चार्ज तोक्ने विषयमा विवाद भएको हो ।

के गर्दा बढि उपयुक्त हुन्छ ? भन्ने विषयमा गम्भीरतापूर्वक छलफल गरिएको र त्यसलाई टुंगो लगाउन बिहीबार बिहान नौ बजे पुनः अर्को बैठक बस्ने सहमति गरिएको नेकपाका प्रवक्ता नारायणकाजी श्रेष्ठले जानकारी दिए ।

पार्टी अध्यक्ष एवम् प्रधानमन्त्री खड्गप्रसाद ओलीको समय अभावका कारण बैठकमा सो विषयमा विस्तृत छलफल हुन नसकेको श्रेष्ठले बताए ।

बिहीबार बस्ने सचिवालय बैठकले जिल्ला कमिटीको इञ्चार्ज र सहइञ्चार्ज टुंगो लगाउनेछ ।

नेकपाको सचिवालय बैठकमा प्रधानमन्त्री एवम् पार्टी अध्यक्ष ओली र दोस्रो तहका अध्यक्ष पुष्पकमल दाहालले संयुक्त रुपमा तयार पारेको पार्टी जिल्ला कमिटीको इञ्चार्ज र

सहइञ्चार्जको सूचीमा वरिष्ठ नेता माधवकुमार नेपालले असहमति जनाएका थिए ।

सांसद र मन्त्री भएकाहरूलाई पार्टी जिल्ला कमिटीको इञ्चार्ज र सहइञ्चार्ज दिन नहुने अडान वरिष्ठ नेता नेपालले लिएपछि निर्णय लिन ढिलाई भएको छ ।

मंगलबार नै सचिवालयको बैठकमा सो विषय प्रवेश गराइएको थियो ।

प्रवक्ता श्रेष्ठले बिहीबार बस्ने बैठकमा सो विषयको टुंगो लगाउने र कार्य विभाजनका अरु थप विषयमा पनि छलफल हुने बताएका छन् ।