काठमाडौं । मेडिकल व्यवसायी दुर्गा प्रसाइँले उपेन्द्र यादवलाई प्रधानमन्त्री बनाउने लबिङमा केपी ओली लागेको बताएका छन् ।

बिहीबार साँझ काठमाडौंमा पत्रकार सम्मेलन गरेर प्रसाइँले भने, ‘उपेन्द्र यादवलाई प्रधानमन्त्री बनाउने लबिङमा लागेका छन् केपी ओली । अब हुँदैनन् । केपी ओलीलाई के भनिदिन्छु भने यो जुगमा केपी ओली प्रधानमन्त्री हुँदैनन् ।’

प्रसाइँले भने, ‘केपी ओलीको पार्टी नै सक्कियो आजदेखि । धेरै फुरफुर गर्दा । टाइटनिक गलत ठाउँमा आएर ठोक्कियो । जहाज अब डुब्ने क्रम शुरु भयो । लेखेर राख्नुस् ।’

उखान र टुक्का ओलीलाई भन्दा राम्रो आफूलाई आउने प्रसाइँले बताएका छन् । उनले भने, ‘हामी हिँड्दै छौँ । उनीहरू ढुंगा हान्दै छन् । प्रहरीले हामीलाई मात्रै दमन गरेको छ ।’

प्रसाइँले गोली लागेर एक जना प्रदर्शनकारी घाइते भएको भन्दै उनको उपचार आफैले गर्ने बताएका छन् । उनले घाइतेको अवस्था गम्भीर रहेको बताएका छन् ।

प्रसाइँले टिप्पर चलाउन नदिएर सरकारले चालकहरूलाई बेरोजगार बनाएको बताए । टिप्पर चलाउन नपाउँदा किस्ता तिर्न पनि नसकेको बताए । उनले टिप्परलाई रातिमा मात्रै चलाउन दिने अति क्रसरहरू बन्द गरिदिएर व्यापारीहरूलाई बेहाल बनाएको बताएका छन् ।