वीरेन्द्रनगर । अमेरिकामा आयोजित गोष्ठीमा भाग लिन कात्तिक पहिलो साता गएकी कालीकोटको तिलागुफा नगरपालिकाकी उपप्रमुख दन्ता नेपाली फर्किएकी छैनन् ।

तत्कालीन माओवादी केन्द्रबाट चुनाव जितेकी उनले अमेरिका पुगेपछि पार्टीसँग पनि सम्पर्क नगरेको सत्तारुढ नेपाल कम्युनिस्ट पार्टी (नेकपा)ले जनाएको छ ।

उपप्रमुख नेपाली अमेरिका लुकेको समाचार बाहिर आएपछि नेकपाका दोस्रो तहका अध्यक्ष पुष्पकमल दाहाल ‘प्रचण्ड’ तनाबमा परेको चर्चा भएको छ ।

इन्टरनेसनल सिटी म्यानेजर एसोसिएसन (आईसीएमए)को निमन्त्रणामा नगरपालिका संघकी सदस्य नेपालीसहित तीन जना अमेरिका गएका थिए ।

एउटै कार्यक्रममा निमन्त्रणा पाएका नेपाली, धादिङको नीलकण्ठ नगरपालिकाका प्रमुख भीमप्रसाद ढुंगाना र नगरपालिका संघका कार्यकारी निर्देशक कलानिधि देवकोटा छुट्टाछुट्टै विमानमा अमेरिका पुगेका थिए ।

तिलागुफाका प्रमुख रतनबहादुर शाहीले कहिले फर्किने भनेर सोध्दा बिरामी रहेको जवाफ आएको बताए । आफ्नाबारे समाचार आउन थालेपछि नेपालीले आफ्नो फेसबुक एकाउन्ट निष्क्रिय पारेकी छन् ।

बिहीबार राष्ट्रिय सभाको निर्वाचनमा नदेखिएपछि नेपाली सम्पर्कविहीन भएको खबर फैलिएको थियो ।

विद्यार्थी राजनीतिमा सक्रिय उनलाई तत्कालीन माओवादीले २०७४ को स्थानीय तहको निर्वाचनमा उपप्रमुखमा उठाएको थियो ।

नेकपा कालीकोटका सचिव नगेन्द्र शाहले उपप्रमुख नेपाली अमेरिका पुगेर सम्पर्कविहीन भएर पार्टीले गरेको सम्मानमा ठेस पुर्‍याएको बताए ।

उपप्रमुखले न्यायिक समिति, योजना तथा अनुगमन समिति, बजेट कार्यान्वयन तथा सुपरिवेक्षण समितिलगायत १३ वटा समितिको नेतृत्व गर्नुपर्छ ।

उपप्रमुख नभएका कारण नगरपालिकामा सम्पन्न भएका योजनाको भुक्तानी पनि दिन नसकिएको नगरप्रमुख शाहीले बताए ।

स्थानीय रेवती शाहीले तीन महिनादेखि उपप्रमुख नहुँदा आफ्नो जग्गाको विवाद नमिलेको बताइन् ।