काठमाडौं । नेपाली कांग्रेसले दुईतिहाइको बलियो कम्युनिस्ट सरकार हरेक क्षेत्रमा असफल भएको भन्दै जनतामा चरम निराशा पैदा भएको जनाएको छ ।

ललितपुरको सानेपामा बुधबार आयोजित पत्रकार सम्मेलनमा सहमहामन्त्री डा.प्रकाश शरण महतले सरकारमा देखिएको निरासा रवि लामिछानेको प्रदर्शनमा देखिएको बताए ।

उनले सरकारबाट जनताले अपेक्षा गरिएअनुसारको काम नभएपछि जनतामा विष्फोट हुने अवस्था सिर्जना भएको बताए ।

सहमहामन्त्री डा.महतले वाइडबडी, बालुवाटारको सरकारी जग्गा, एनसेल प्रकरण लगायतका विषयमा छानविन गरेर दोषीलाई कारबाही गर्न माग गरे । डा.महतले वर्तमान सरकार भ्रष्टाचारमा चुर्लुम्म डुबेको बताए ।

प्रधानमन्त्री केपी ओलीले नै भ्रष्टाचार गर्ने र सरकारी जग्गा हड्प्नेलाई संरक्षण गरेको उनले आरोप लगाए । वर्तमान सरकारले कामभन्दा पनि गफ धेरै गर्ने गरेको बताए ।

नेपाली कांग्रेसले दोस्रो चरणको जागरण अभियान शुरु गर्न लागेको भन्दै डा.महतले पहिलो चरणमा भएका सामान्य गल्ती र कमजोरीलाई यस पटक नदोहोर्‍याइने बताए । उनले अब नेपाली कांग्रेस जनताको घरघरमा पुगेर संगठन सुदृढीकरण गर्ने बताए ।

नेपाली कांग्रेसका भ्रातृ संगठनहरूको महाधिवेशन छ महिनाभित्र गर्ने उनले बताए । छ महिनाभित्र महाधिवेशन गर्नका लागि सोही अनुसारको संरचना तयार बनाइएको डा.महतले उल्लेख गरेका छन् ।