काठमाडौं । अन्तरिम सरकारकी प्रधानमन्त्री सुशीला कार्की र नेपालका लागि भारतीय राजदूत नवीन श्रीवास्तवबीच भेटवार्ता भएको छ ।

मंगलबार प्रधानमन्त्री कार्कीसँग भारतीय राजदूत श्रीवास्तवले भेट गरेका हुन् । निर्वाचनका लागि छिमेकी मित्रराष्ट्र भारतले गरेको सहयोगका लागि राजदूत श्रीवास्तवलाई प्रधानमन्त्री कार्कीले धन्यवाद दिएकी छिन् ।

कार्कीले राजदूत श्रीवास्तवसँग नेपालको विशेष अवस्थामा हुन लागेको प्रतिनिधिसभा निर्वाचनलाई सहज रूपमा सम्पन्न गर्न सवारी साधनलगायत विभिन्न सामग्री उपलब्ध गराएकोमा भारतीय जनतालाई धन्यवाद दिएकी छिन् ।

भारतीय राजदूत श्रीवास्तवले नेपालको लोकतान्त्रिक प्रक्रियामा सदैव साथ रहने र मित्रवत् छिमेकीका नाताले सहयोग गर्नु आफ्नो कर्तव्य रहेको बताएका छन् ।

उनले निर्वाचनपछि नेपालले हासिल गर्ने लोकतान्त्रिक र संवैधानिक स्थिरता भारतका लागि पनि महत्वपूर्ण हुने बताएका छन् ।

फागुन २१ गते हुन लागेको निर्वाचनका लागि भारतले नेपाल सरकारलाई ६ सयभन्दा धेरै सवारी साधन र निर्वाचन सामग्रीहरू उपलब्ध गराएका छन् । भारतले नेपाललाई बेलाबेला ठूलो सहयोग गर्दै आएको छ ।